TRUE : Mukhang hindi na itutuloy ni Cherry Pie Picache ang unang balak na magsampa ng demanda laban kay Baron Geisler dahil sa pambabastos nito sa kanya.
As of presstime, ayaw pa ring magsalita ni Cherry Pie tungkol dito dahil ang anak daw ang inaalala niya na nag-aaral na sa Ateneo kaya baka madamay pa raw ito sa nakakahiyang karanasan kay Baron.
Sinubukan din naming kunan ng sagot si Baron tungkol dito pero hindi ito sumasagot sa mga tawag at text namin.
Ayon sa manager ni Cherry Pie na si Ed Instrella, ipinarating na nila sa PAMI (Professional Artists Management Incorporated)ang reklamong ito at baka ipagbawal na ang mga talents na hawak ng mga miyembro ng PAMI na makatrabaho si Baron.
Si Baron ay hawak ni Arnold Vegafria na miyembro rin ng PAMI.
Nakausap naman namin si Arnold at sinabi niyang makikipag-miting pa raw siya sa ABS-CBN 2 bago siya magbigay ng anumang pahayag.
TANONG : Natuluyan kaya si Sharon Cuneta sa sakit niya at na-hospital na raw ito kaya hindi naka-apir sa Star Power nung nakaraang Linggo?
Si AiAi delas Alas muna ang pumalit sa megastar at hindi pa raw masasabi kung kaya na ba nitong bumalik sa susunod na Linggo.
Basta pina-standby pa raw uli si AiAi sa susunod na Linggo.
TOTOO KAYANG sa mga showbiz functions lang nakikitang magkasama itong showbiz couple na ito? Sa mga family gatherings daw ay hindi na sila magkasama at mukhang natuluyan na sa hiwalayan ang matagal na nilang problema.
Ang problema raw talaga ay na kay aktres at nakakaawa raw ang kalagayan ni aktor dahil pinipilit pa rin daw nitong maayos ang kanilang problema.
TSIKA LANG : Mamayang gabi na ang press launch ng Machete at excited na si Aljur Abrenica dahil kakaibang Aljur na ang makikita rito sa bagong telefantasya ng GMA 7.
Dahil sa Machete, naging disiplinado na ang young actor at itutuluy-tuloy na raw nito ang pag-ensayo at pagda-diet para mapanatiling maganda ang katawan.
Kapansin-pansin naman na si Bela Padilla ang madalas na kasama ngayon ni Aljur at hindi si Ryza Cenon na leading lady din dito ni Aljur.
Kaagad na naging close daw kasi agad sina Bela at Aljur.
Sa January 24 na magsisimula ang Machete sa GMA Telebabad.