CEBU, Philippines - Ang maong awit nga nag-ulohan “Saloma Sa Gugmang Nahanaw” gihatagan og kinabuhi ni Cherry May Fernandez nga mao usab ang nahimong Best Interpreter.
“I share this victory to our Almighty God, our creator for giving me this wonderful blessing as the Best Interpreter and the Grand Prize winner of the 31st Cebu Pop Music Festival for the song, “ Saloma sa Gugmang Nahanaw” composed by Glenn Salve,” matud pa ni Fernandez.
Kini maoy labing unang higayon nga misalmot ug miapil sa sangka sa awit nga Bisaya si Fernandez, hinungdan nga wala niya damha nga malangkat niya ang kadaogan isip Best Interpreter.
Giangkon ni Fernandez nga naka-awit na siya sa Cebu Popular Music pero isip guest tungod kay nasakop man siya sa sikat nga UV Chorale.“Wala ko magdahum nga makadaog ko,” matud pa ni Fernandez diin dason pa niya nga ang iyang gipangayo mao lang hatagan siya og presence of mind nga dili siya makalimot sa lyrics aron mahatagan niya og kinabuhi ang maong awit.
Sigon pa ni Salve, wala usab siya magdahum nga makadaog. Dili na niya bag-o ang pagsalmot sa Cebu Popular Music diin una niyang apil 1998. Una siyang midaog niadtong 2006 ug nasubli karong tuiga.
Doble ang kadaugan ni Salve tungod kay nahimo pud nga third prize winner ang lain pa niyang entry nga giulohan og “Pastilan.” Nakaangkon si Salve og P200,000 (P150, 000 isip grand prize winner, P50, 000 sa third prize.) Samtang nakaangkon sa ikaduhang ganti ang “Call Center Agent” ni Eugene Tan, ug P100, 000 ang cash prize. Si Fernandez nakadawat og P15, 000 cash isip best interpreter.
Agig pagbukas sa maong tulumanon, ang interpreters ug composers sa 12 ka finalists naghiusa og pwersa aron awiton ang “Matag Litok Awiton” ni Engr. Bert Rosales nga finalists sa ika-siyam nga Cebu Pop.
Misamot pud ang kahugyaw sa Cebu Popular Music Festival gumikan sa presensya sa Sugbuanong Diva nga si Dulce, isip special guest.
Si Sam Costanilla maoy main host sa maong indigay kauban ang guest co-host nga si Pinoy Dream Academy scholar Apple Abarquez. Samtang gipahimug-atan ni Cebu Pop Executive Director Philogene Florita nga dili molungtad og ingun niini kadugay ang maong indigay kung wala ang chairman ug amahan sa Cebu Pop nga si Congressman Eduardo Gullas.
Si Congressman Gullas inubanan sa Cebu Arts Foundation Inc. (CAFI) ang producer sa tinuig nga sangka sa mga komposisyon agig pagtamod sa Sugbuanong musika, ingon man pag-ugmad ug pagpalambo niini.
Sa iyang pagkigpulong, gipadayag ni Gullas nga ang kapistahan gyud maoy labing importante nga okasyon, diin ang uban kay dayan-dayan lang na. Lakip sa mga finalists karong tuiga mao ang Kilid Sa Dalan ni Erwin Lirazan, Gugma Na Ba? ni Jun Cabillar, Wa Nay Lain ni Dennis Martin, Ikaw Ang Hinungdan ni Eugene Tan, Panahon Ko Na ni Norman Jabonero, Ug Di Ka Na Gyud Maghilak ni Lauro Flores, Isaad Ta Karon ni Joseph Abella, Kanus-a Pa Kaha ni Jun Cabillar ug Bangon Katilingban ni Russel Alegado.