Sinulog Idol 2011: The Drama, The Performance, The Voice

CEBU, Philippines - Nagkainit na ang nagpadayon nga Sinulog Idol 2011 nga nagsugod niadtong Biyernes, Enero 7, diin gipaila ang 12 ka finalists nga maoy magtigi alang sa titulo.

Dili lalim ang malakip sa maong indigay sanglit kada adlaw ang ilang rehearsal ug matag gabii dunay matagak nga usa ka finalist, hangtud nga unom na lang ang mahibilin ug maoy magkumbati og maayo sa grandfinals karong Enero 13, diha sa Fuente Osmeña Circle.

Niadtong Lunes, atol sa “Upbeat Night” na-eliminate si Neven Quijano, human siya maoy nakakuha sa labing taas nga score gikan sa mga hurado nga gilangkuban nila ni Center for Pop-Cebu branch manager Jay Unchuan, Pinoy Dream Academy scholar Apple Abarquez ug Hugyaw editor Ryan Mark, nga dili kumbinsido sa iyang performance sa kanta nga “ Hot Stuff.” 

Si Quijano maoy ikaupat nga finalist nga natangtang sa maong kumpetisyon nga anaa na sa ikaduha niini ka tuig. Ang unang tulo mao sila si Christian Cayobit, Donna Belle Cabague, ug Jan Alfie Bartolome.

Kagabii, nagtigi alang sa “Jukebox Night” sila si Primrose Pacenio, Emman Zanoria, Ralph Mallapre, John Dolph Lador, Aya Narvios, Rachelle Mae Faelnar, Feart Aguilar, ug Philip Mancol, diin usa kanila ang gipaabot nga matangtang. Si Aya ug Ralph nahimo na nga “Star of the Night,” susama ni Rachelle nga maoy midaog sa maong special award niadtong Lunes sa gabii. 

Si Rachelle nga nahinabi sa Banat News Hugyaw human sa indigay niadtong Lunes miingon nga wala siya magdahom nga siya maoy makalangkat sa special award pinaagi sa iyang “Hush Hush” by Pussycat Dolls performance.

“Ako lang gyud gibuhat akong best didto sa stage, pasalamat kung dako sa akong family grabe gyud ka supportive sa pag-apil nako sa Sinulog Ido,” suma pa ni Raechelle

Bata pa lang si Rachelle gipangandoy gyud niya nga mahimong singer, gani pipila na kahigayon nga gihimo siya nga guest performer sa mga nagkadaiyang mall dinhi sa Sugbo.

Samtang usa sa giisip nga lig-on sa maong singing contest mao ang tinun-an sa Abellana National School nga si John Dolph nga nailhan usab isip “Andot.”

Una kini nga higayon nga miapil si Andot og singing contest busa wala niya damha nga makadawat dayon siya og mga pagdayeg gikan sa mga tawo.

Giawit ni Andot ang Solo ni Iyaz, hinungdan nga perteng naka-abiba sa mga babaye nga nakauyon sa performance sa nahisgutan.

Paborito niya nga judge si Jay gumikan kay bisan magsige kini og pangasaba atol sa ilang rehearsal isip usab nila mentor, daghan usab sila og makat-onan niini nga mga ideya aron molambo og maayo ang ilang talento.

Samtang gikahadlokan niya nga hurado mao si Ryan Mark gumikan kay maghilom lamang kini niya pa, apan diretso duslak ang mga komentaryo.

Ang Sinulog Idol produksyon sa Sinulog Foundation inabagan sa Soundtraxx Recording Studio ug Center for Pop. Ang labing unang Sinulog Idol mao si Jackie Chang kinsa nalakip sa “Idol” series ni Sarah Geronimo sa ABS-CBN sa milabay nga tuig.

Ang Sinulog Idol 2011, makita diha sa Fuente Osmeña Circle matag alas 7:30 sa gabii hangtud karong Huwebes.