Kris imbestigahon sa Senado

CEBU, Philippines - Imbestigahon matud pa si Kris Aquino sa Senado gumikan sa taho nga siya maoy mikamang aron si Ai-Ai delas Alas maoy mamahimong Best Actress sa milabay nga Metro Manila Film Festival.

Ang showbiz news head sa DZRH nga si Tita Swarding, nagkanayon sa showbiz-oriented program OkRyan sa dyRC 648 kHz kagahapon sa buntag nga si Senador Gringo Honasan matud pa maoy nagtinguha og imbestigasyon kabahin niini.

Si Kris kasamtangan karong nagbakasyon sa Singapore kauban ang iyang mga anak.

Mayor ang nanguyab ni Kris

Si Mayor Strike Revilla sa Bacoor, Cavite matud pa maoy bag-o karong iring-iring ni Kris Aquino.

Pero ang tsika nga nasagap ni DZRH showbiz news head Tita Swarding sa iyang balita kagahapon sa OkRyan sa dyRC 648 kHz mao nga sa February 14, 2011 pa matud pa angkonon ni Kris ang maong tsika nga nangulitawo niya si Mayor Strike, sanglit mao ni iyang birthday.

Ang tsika pa giintriga pa gyud sa mga himantayon nga mas hugyaw gyud si Mayor Strike itandi kang Makati City Mayor Jun Jun Binay nga gilambigit pud kang Kris kaniadto.

Kini tungod kay 332 movie tickets ra sa Metro Manila Film Fest entry Dalaw nga gibituonan ni Kris, ang gipalit ni Binay, samtang si Strike, mikabat gyud og 500 tickets ang gibayran ug gipanghatag sa iyang mga constituents sa Bacoor.

Valerie magpabilin sa ABS-CBN

Dili tinuod ang mga balita nga mubalhin si Valerie Concepcion sa TV 5. Ang tsika, mubakasyon una siya sa Singapore ug sa iyang pagbalik sa nasud, tukion ang iyang musunod nga project sa ABS-CBN, hulip sa nawagtang nga Pilipinas Win Na Win.

Kris vs. Sharon!

Sila si Kris Aquino ug Sharon Cuneta ang gipilian karon sa management aron hatagan og teleserye. Hinuon sigurado na ang duha ka projects ni Kris sa ABS-CBN karong tuiga, ang Pilipinas Got Talent ug Price Is Right.

Jewel gihingusgan na sa ABS-CBN

Sunod-sunod na ang publicity ni Jewel Mische sa ABS-CBN. Una siyang gipakita sa MMK episode niadtong Sabado kauban si Baron Geisler, nga gisundan gyud dayon sa iyang live interview ni Boy Abunda sa The Buzz pagka ugma. Si Jewel maoy bag-ong leading lady ni Gerald Anderson sa umaabot teleserye Bagwis.

Tayong Dalawa sa Singapore

Kasamtangang makita karon didto sa Singapore ang teleserye nga Tayong Dalawa. Suma pa ni Kris Aquino nga tua ron didto, sa channel 13 didto makita ang maong serye. Gi-dub matud pa kini sa English. Sila si Kim Chiu, Jake Cuenca, Gerald Anderson ug Coco Martin ang mga pambato sa maong serye.

Aga weekly show ang nagpaabot sa TV5

Bisan og kumpirmado na ang pagbalhin ni Aga Muhlach sa TV5, mahinayon gyud ang pagsalida sa ilang pelikula ni Angel Locsin sunod buwan. Kini mao ang “Huling Sayaw” nga ubos sa Star Cinema. Samtang usa ka taga TV5 ang mibutyag ngadto kang Vinia Vivar, kolumnista sa Pang-Masa nga usa ka weekly show ang giandam sa network alang kang Aga. Ang nakanindot pa matud pa sa offer, kay dunay say si Aga sa iyang show ug co-producer pa gyud siya sama ni Willie Revillame.

Dolphy nanamilit na?

Dunay nasagap nga balita ang beteranong showbiz columnist nga si Tita Swarding nga matud pa gipundok na ni Comedy King Dolphy ang iyang tanang mga anak ug mga apo kay nanamilit na matud pa ang nahisgutan.

Nahitabo matud pa ang maong panagtigum niadtong adlaw sa Pasko. Ang tsika pa, namahayag na matud pa si Dolphy nga paminaw niya dili na siya magdugay pa.

Cancer (wala madetalye unsa nga matang) matud pa ang balatian nga gihambin karon sa Comedy King.

Kining maong balita unang giluwatan ni Tita Swarding sa OkRyan sa dyRC 648 kHz kagahapon sa buntag, diin niya pa, ang tinubdan niini, usa matud pa sa mga apo sa komedyante nga mitug-an ngadto sa usa ka director.

Labihan matud pa nga nakabakho ni Zsa Zsa Padilla atol sa maong panagtigom.  (BANAT)