Pero 'di ginawang big deal, sikat na aktres nagyabang na pinasikat ang iniendorsong produkto

Sa Jan. 6 na pala sisimulan ni Direk Eric Qui­zon ang taping ng Babaeng Hampaslupa, ang unang teleserye ng TV5 na maglo-launch kay Alex Gonzaga as a dramatic star. Makakasama niya rito sina Alice Dixson, Bing Loyzaga, Jay Manalo, Alwyn Uytingco, at Ms. Susan Roces.

Pumayag na si Ms. Susan na gumanap na ina at lola nina Alice at Alex, respectively at ang pamangking si Sheryl Cruz ang excited sa pagbabalik-telebisyon ng tiyahin.

Si Alwyn na ang leading man ni Alex at hindi si Kean Cipriano na na-link sa dalaga and hopefully, tanggapin ang loveteam ng dalawa kahit very much on sina Alwyn at Jennica Garcia. Ang sabi, pasok din sa teleserye sina Carlo Aquino at Mart Escudero pero napanood namin si Mart sa Jillian: Namamasko Po!

Primetime ang timeslot ng Babaeng Hampaslupa, and hopefully, hindi pabagu-bago ng oras at hindi magaya sa My Driver Sweet Lover na paiba-iba ang sked.

* * *

Mali naman yata ang nasulat na kaya pinalitan ang sikat na aktres bilang endorser ng isang very big account ay dahil ipinagyabang nito na siya ang nagpasikat sa produkto. Kilala namin ang aktres at hindi nito ipinagmalaki kailanman ang mga ini-endorse.

Nagpapasalamat pa nga ito sa mga kumukuha at nagtitiwala sa kanya dahil alam nitong malaki ang maitutulong sa kanyang career. Hindi rin kilalang mayabang ang aktres, kaya unfair sa kanya ang kumalat na tsika sa business sector na siya ang “gumawa” kaya sumikat ng husto ang produktong dating ini-endorse.

Hindi na rin ginawang big deal ng aktres na pinalitan siyang endorser dahil may mga pumalit na ibang produktong kanyang ini-endorse. Hindi galing sa showbiz ang balita, kaya obvious na sinisiraan ang aktres.

* * *

Excited at aminadong pressured si Aljur Abrenica sa Machete dahil kahit may mga kasama siya, pangalan niya ang nakataya at siya ang magdadala ng fantaserye. Kaya doble ang effort ng young actor sa pagwu-workout para mas gumanda pa ang katawan at hindi siya mapintasan lalo na ’pag naka-bahag o nakahubad.

Nabanggit din ni Aljur na nag-text siya kay Cesar Montano para humingi ng tips, ang sagot sa kanya ng aktor, easy lang siya dahil kaya niyang maging Machete.

Samantala, pumayag kaya si Cesar na mag-guest sa Machete? Nabanggit kasi ni Ms. Redgie Magno na susubukan nilang kausapin ang aktor para mag-guest sa proyektong una niyang ginawa at pinagbidahan. Maganda nga namang pang-come on sa mga viewers na mapanood ang original at ang Machete ngayon.

Sa Jan. 24 na ang pilot ng Machete, kaya ilang linggo na lang at mapapanood na si Aljur na nakahubad at naka-bahag.

* * *

Sa Tween Hearts, hindi agad sinabi ni Jacob (Jake Vargas) kay Julio (Jao Mapa) na anak siya nito, naisip nitong maging malapit muna sa ama, kaya nag-apply siyang PA (production assistant) ng banda nito.

Gumagawa ng paraan si Leslie (Lexi Fernandez) para magselos si Aya (Joyce Ching) kay Chrid (Kristoffer Martin) at ginamit si Tracy (Joanna Marie Tan) para mag-away ang dalawa. Sa monthsary nina Aya at Chris, gumimik si Leslie para hindi makarating si Chris.