Bea ug Zanjoe sige na gyud og date

CEBU, Philippines - Duha ka mga paresan ang nasigpatan nga nag-date niadtong December 26, alas nuwebe sa gabii didto sa Starbucks Edsa Shang.Pwes, unang nakit-an sila si direk Lino Cayetano ug stylist Liz Uy.Pipila ka minutos miabot sila si Zanjoe Marudo ug Bea Alonzo ug mi-join sa table nila ni Liz ug Lino.

Hayden, Vicky nagpahayahay sa Boracay

Bisan wala na’y relasyon, gikatahong nag-uban karon sila si Dr. Vicky Belo ug Hayden Kho Jr. sa usa ka sikat nga resort sa Boracay aron didto saulogon   ang Bag-ong Tuig.Gumikan niini, misamot ang mga pagduda sa kadaghanan nga matud pa nga naa pa gyu’y relasyon ang duha.

Gipalikay sa usa’g-usa

Giingong dili na isunod ang mga production numbers nila ni Cristine Reyes ug Sarah Geronimo sa ASAP XV aron dili sila kiwawan sa usa’g-usa.Kahinumduman nga nagkabangi ang duha kaniadto human gipadungog-dungogan ni Cristine si Sarah sa iyang Twitter account .Hangtud karon , pabilin nga nagpakahilom si Sarah sa maong isyu.

Bong ug Vic mag-iyahay sunod tuig

Giingong magbuwag na sa sunod tuig nga Metro Manila Film Festival sila si Senador Bong Revilla Jr. ug Vic Sotto. Ang duha maoy kasamtangang bida sa pelikulang Si Agimat at si Enteng Kabisote nga nag-una karon sa takilya. Matud pa nga mohimo og sequel si Bong sa “Ang Panday” nga maoy entry niya sa MMFF niadtong 2009. Samtang si Vic mohimo usab og kaugalingon niya nga sequel sa Enteng Kabisote.

Bianca mitingog na

Gihimakak ni 2009 Bb. Pilipinas-Universe Bianca Manalo ang isyu nga naglambigit sa iyang pangalan ngadto sa basketbolista nga si James Yap. Matud pa sa dalaga nga iyang nahimamat si James sa miaging tuig sa dihang siya ang gihimong muse sa Purefoods. Giklaro ni Bianca nga “hi and hello” ra sila kutob sa higayon nga magkasugat silang duha.