Aktor na suki ng GMA 7 sa TV5 gagawa ng game show

Malakas ang tsismis na isa sa mga araw na ito’y pipirma ng exclusive contract sa TV5 ang actor na napapanood sa mga shows sa GMA 7. Kahit walang kontrata sa Channel 7, sa Kapuso network ang karamihan ng shows ng actor.

Pero sa isang show na lang napapanood ang actor at hindi pa Kapuso produced at dahil wala siyang exclusive contract sa Siete, naging madali at maayos ang negosasyon sa nalalapit daw nitong pag­lipat. Pero hindi raw nito iiwan ang nag-iisang show sa Channel 7.

Sabi’y dalawang shows agad ang gagawin ng actor sa TV5, may comedy show kung saan siya magaling at game show na ang title daw ay Su­wer­teng-Suwerte. Alam kaya ng actor at ng mga taga-TV5 na ang sisimulang game show ni Joey de Leon sa GMA 7 sa Novem­ber 8 ay Suwerteng-suwerte sa Siyete: Press it! Win It ang title?

* * *

Sa presscon/launching nila ni Empres Schuck bilang endorsers ng Sketches, make-up ng Natasha, binuking ni Jennica Garcia na may two suitors ang inang si Jean Garcia. Ang isa raw ay mas mas bata sa ina and the other one is older.

Nang makita si Jean sa birthday dinner ng manager niyang si Manny Valera, ang tungkol sa ibinu­king ni Jennica ang aming tinanong at ‘di ito makapaniwala na itsitsika ng anak sa press ang kanyang love life.

Pero nilinaw ni Jean na walang matanda sa suitors niya, puro bata at pawang foreigners ang tatlong manliligaw at hindi dalawa. ‘Kaloka nga dahil ang isa’y pilot, ang isa’y flight attendant at ang isa’y air force.

Pare-parehong may air element ang job ng suitors ni Jean at ayaw sabihin kung sino sa tatlo ang may chance na kanyang sagutin at maging BF.

Samantala, malapit nang magtapos ang Ilumina at kundi kami nagkakamali’y hanggang November 26 na lang. Kampante ang manager ni Jean na si Manny Valera na bibigyan ito ng next project ng GMA 7 kahit walang exclusive contract.

* * *

Nai-press release na ng ABS-CBN na ililipat sa Bandila sina Julius Babao at Karen Davila dala nang pagbabalik nina Noli de Castro at Korina Sanchez sa TV Patrol kasama si Ted Failon. Pero bakit may tsikang hindi pa tinatanggap ni Karen ang bago niyang assignment?

May nag-iisip tuloy na baka lumipat sa TV5 si Karen, pero may kontrata pa yata ito sa ABS-CBN, kaya hindi puwede. Basta ang alam namin, sa News & Public Affairs department ng TV5 na nagwu-work ang husband niya.

* * *

Dahil pumirma na ng kontrata sa GMA Artist Center ang Magalona siblings na sina Maxene, Saab, Elmo at Arkin, matutuloy na ang plano ng GMAAC at GMA Network na i-push ang love team nina Elmo at Julie Ann San Jose.

Alam pala ng network at ng GMAAC na malakas ang clamor na gawing permanenteng love team sina Elmo at Julie Ann mula nang mapanood sa Party Pilipinas.

Bakit hindi isama sina Elmo at Julie Ann sa next episode ng Reel Love Presents…Tween Hearts? Babagay sila sa Sunday series dahil ka­pareho nilang mga ba­gets ang mga bida.