"Noy" pambato sa Academy Awards

CEBU, Philippines - Ang docu drama film nga Noy maoy napili nga pambato sa Pilipinas alang sa Best Foreign Language film category sa umaabot nga 83rd Academy Awards. Tsika sa Philippine Entertainment Portal, ang maong pelikula nga gibituonan ni Coco Martin, may katigi nga lain pang tulo ka mga pelikula, una pa hingpit nga gipili sa Film Academy of the Philippines isip official entry. Si Dondon Santos ug Coco maoy mga director niini.

Richard namungingi ang career

Bunga matud pa sa sige og ampo ingon man simba ni Annabelle Rama ang positibo karon nga dagan sa career ni Richard Gutierrez. Kini suma mismo sa actor TV/ host, nga nahinabi sa kolumnista sa Pilipino Star Ngayon nga si Nitz Miralles. Gawas nga blockbuster hit ang iyang pelikula nga In Your Eyes kauban sila si Anne Curtis ug Claudine Barretto, nag-una pa gyud didto sa Mega Manila ratings game ang Survivor Philippines: Celebrity Showdown. Dugang pa niini, malampuson usab kaayo ang documentary special nga Anatomy of Disaster diin siya maoy host, ug gitakda nga isalmot sa New York Festival ang lain pa niyang documentary special Wildlife for Sale. Pero sa lovelife, zero pa siya human sila nagbuwag ni Jewel Mische.

P10 nga concert ticket

Hugyaw ang umaabot nga concert ni American Idol finalist Adam Lambert sa Pilipinas sunod buwan tungod kay dunay ticket nga nagkantidad lang og P10. Kini tungod kay sa October 10, 2010 o 10-10-10, mahitabo ang nahisgutang concert didto sa SM Mall of Asia Concert Grounds.

Lady Gaga paborito ni Melai

Paborito ni Melai Cantiveros ang sikat nga RNB singer nga si Lady Gaga hinungdan nga  ang mga awit  sa maong international singer ang kasagaran niya nga gamiton sa iyang mga production number sa ASAP XV.

Nanion gud tawon!

It’s not true.” Maoy simple nga paghimakak ni Dingdong Dantes kabahin sa taho nga matud pa nanion siya og pusil sa usa ka customer sa bar sa Roxas Avenue, niining bag-o lang.

Carlo mobalik sa Dos?

Gidungog nga kuhaon pagbalik sa ABS-CBN ang Kapuso star nga si Carlo Aquino  apan giklaro  sa aktor nga wala siya’y nadawat nga pormal nga offer gikan sa kanhi niya mother network.

Good luck Rocco!

Giwagtang na ang character ni Rocco Nacino sa  umaabot nga serye sa GMA-7 nga  Paano Ba ang Maging Ina? aron maka-focus ang aktor sa “Koreana”.

Anne namaligya og balay

Wala gihapon mahalin ang balay ni Anne Curtis busa  todo ang gihimo niya nga promosyon niini.

Carla dili gyud magpa-sexy

Subling gitanyagan si Carla Abellana nga mahimong cover sa usa ka sexy magazine apan gibalibaran na usab kini sa aktres gumikan kay dili pa gyud siya andam nga magpa-sexy.

Queenie happy para ni Binoe

“I’m happy for them. I’m happy for my dad kasi hindi na siya lonely at nagmahal siya ulit.” Kini maoy makahuluganon nga pamahayag ni Queenie Padilla kabahin sa pagpakasal sa iyang amahan nga si Robin ug ni Mariel Rodriguez didto sa India niadtong August 19.

Cristine nakauyon ni Zanjoe

Aminado si Cristine Reyes nga daghan ang nakadayeg sa chemistry nila ni Zanjoe Marudo  sa telebisyon  busa iyang panghinaut nga magpares usab sila puhon sa usa ka pelikula. Samtang gipadayag sa aktres nga magbaha ang mga init nga eksena nila ni Zanjoe sa serye nga Kristine sa ABS-CBN  busa angayan kini nga atngan sa iyang mga fans.

Joy mihimakak sa isyu

Gihimakak sa  manager sa Sexbomb Dancers nga si Joy Cancio ang  taud-taud na nga report nga matud pa nga kusog kaayo siya molubag sa iyang mga sakop kung hisgutan na ang kuwarta. “Wala namang ganung factor. Kumbaga, tsismis lang ‘yon.”

Financial support

Nagkasinabot na sila si  Liezl Sicangco ug sa abogado ni   Robin Padilla kalabot sa financial support sa ilang mga anak nga miabot ngadto sa  5,000 Australian dollars matag buwan. Tag- 1,000 sila si Queenie, Kylie, ug  Zhen samtang  2,000 usab alang kang  Alih.

Iza umaabot nga co-host sa Eat Bulaga

Gikatahong nakigtagbo na ang manager ni Iza Calzado nga si Noel Ferrer sa mga kadagkuan sa Eat Bulaga kagahapon, aron tukion ang pormal na nga pagsulod sa actress isip labing bag-ong co-host sa nahisgutang noontime show.

Tsika pa ni Nitz Miralles, sa Pilipino Star Ngayon, kun walay kakulian, sa Oktubre na, o sunod buwan na, mugawas si Iza kauban ang laing usa pa, sa Eat Bulaga.

Samtang, kagahapon, nagpictorial na si Iza para sa iyang umaabot nga teleserye sa GMA-7, ang “Beauty Queen” diin unang gikataho nga ibutang sa panghapon nga timeslot, apan nahukman nga mao nay ihulip sa naghinapos nga Endless Love.

Dugang tsika ni PSN columnist Nitz Miralles, sa September 27, gitakda ang unang taping ni Iza alang sa Beauty Queen, ubos sa direksyon ni Joel Lamangan.

Pagkakaron, nagkat-on pa si Iza og beauty-queen wave.

Samtang sama sa gikataho dinhi sa Banat Hugyaw ug sa gitino ni Miss Universe 4th Runner-Up Maria Venus Raj sa OkRyan sa dyRC 648kHz, niadtong Miyerkules, wala pa gyuy nadawat nga pagtugot ang GMA-7 gikan sa Binibining Pilipinas Charities Inc., aron malakip ang nahisgutang beauty-queen sa teleserye ni Iza.

Sa pikas bahin gitakda nga isalida ang umaabot nga pelikula ni Iza sunod buwan. Kini mao ang White House, ubos sa Regal Films, diin sa poster pa lang tataw na kaayo unsa iyang role.

Pero matud pa nga bisan og multo ang role ni Iza, top billing gyud ang gihatag ngadto niya sa poster.