Lovi andam na

CEBU, Philippines - Dili na mamili og role si Lovi Poe, bahalag sexy basta kay kumportabli siya. Nangandam na siya karon para sa Shake Rattle & Roll 12 ug Temptation Island sa Regal Films.

Tweens ilusad pinaagi sa Tween Hearts

Hingpit na nga iduso paingon sa kabantog ang labing bag-ong grupo sa mga batan-ong artista sa GMA-7, nga gitawag og Tweens.

Kini pinaagi sa ilang kaugalingong walo ka episode nga teleseries matag Domingo, ang Reel Love presents Tween Hearts.

Magtuki kini sa mga suliran ug hagit nga maghamok sa mga batan-on karon, diin panguluhan ang grupo nila ni Barbie Forteza ug Joshua Dionesio, uban pud sila si Bea Binene ug Jake Vargas.

Ang uban pang mga sakop sa Tweens nga maaninaw sugod karong Domingo, September 26 sa hapon, human sa Party Pilipinas mao sila si Joyce Ching, Kristoffer Martin, Lexi Fernandez, Louise de los Reyes ug Derek Monasterio.

Ubanan pud sila sa mga beterano na sama nila ni Sylvia Sanchez ug Emilio Garcia. Naa pud si Roxanne Barcelo.

Charice Asia’s Rising Pop Star

“Asia’s Rising Pop Star.” Kini maoy titulo karon nga maghulagway kang Charice, basi sa artikulo sa Newsweek Magazine nga sinuwat ni Sonia Kolesnikov-Jessop.

Si Jessop nakasulti niini, sanglit si Charice ra matud pa ang bugtong Asian singer nga nasulod sa top 10 sa Billboard 200 album chart niadtong Mayo, pinaagi sa iyang U.S debut album, Charice.

Malampuson usab kaayo nga nalakip si Charice sa sikat kaayo nga TV series nga Glee, nga nagsugod na bag-ohay lang.