Unang Cebu Runway's Best modeling competition ipahigayon

CEBU, Philippines - Sa unang higayon, dinhi sa Siyudad sa Sugbo, ipahigayon ang konsepto sa pagkaplag sa labing maayong modelo nga morampa sa entablado. Modelo nga mahimong inspirasyon sa mga kabataan nga mahiligon sa modeling, kinsa ikatandi sa mga inila sa tibuok kalibutan sama nila ni Tyra Banks, Naomi Campbell, Linda Evangelista, ug uban pa. Pinaagi sa Moonwalk Cebu, usa ka paspas nga nagtubong event, model, and entertainment management body dinhi sa Queen City of the South, ipahigayon ang Cebu Runway’s Best 2010, usa ka modeling competition.

Bayente ka ambongang lalaki ug 20 ka makabibihag nga mga babaye ang magtigi sa pre-pageant ug semifinal rounds diha sa Robinsons Place Cebu karong umaabot October 9. Napulo ka paresan ang pilion aron maoy magpatalbogay sa grand coronation night pagka-November 13 diha sa Pagcor-Cebu Teatro Casino sa Waterfront Lahug.

Kun ikaw 14-21 years old, 5’8 pataas ang gitas-on sa lalaki ug 5’7 pataas ang gitas-on sa babaye, dunay maayong pamarog, makabibihag nga lawas, maayo’g gawi ug pamatasan, disiplinado sa kaugalingon, ug bukas alang sa personal improvement, pwes, apil na ning maong modeling search. Fill up dayon sa application form ug i-submit kini kauban sa imong full-body ug close-up pictures sa Lemuel Rosos Boutique nga anaa mahimutang sa Duterte Street, Banawa Cebu City. Mahimo kang motawag sa (032) 255-4492 / 511-8660 / 09216225888 alang sa dugang kasayuran. Hangtod lamang sa September 24 ang pagpanawat sa application.