Sa wakas, napanood ko na kagabi sa Cultural Center of the Philippines (CCP) ang Cats kaya maraming-maraming salamat kay Papa Miguel Belmonte dahil sa complimentary tickets na ipinadala niya sa akin.
Very true ang sinabi sa akin ni Papa Miguel, marami akong makikita na pussy sa CCP. Pussy as in pussycats dahil mga pusa nga ang mga bida sa Cats.
Lalo kong minahal si Papa Miguel dahil sa mga tickets na ibinigay niya. Talagang itinago ko ang kanyang “short note!” para sa akin.
* * *
Sold out ang tickets ng Cats. Malalaking kumpanya raw ang bumibili ng mga tickets para sa kanilang mga empleyado kaya na-extend ang musical play na pinagbibidahan ni Lea Salonga.
Walang bakanteng silya ang Main Theater ng CCP nang manood ako kagabi, isang magandang sign na tinatangkilik na rin ng mga Pinoy ang mga ganoong klase ng show.
Hindi ang Cats ang unang ipinalabas sa CCP dahil dito itinanghal ang Miss Saigon.
Sold out din ang ticket selling para sa Miss Saigon nang dalhin ito ni Cameron Mackintosh sa Pilipinas noong 2000. Imagine, 10 years na pala ang nakalilipas mula nang mapanood sa ating bayan ang musical play na nagpasikat ng husto kay Lea.
* * *
Lumarga na si Venus Raj sa Las Vegas noong Miyerkules ng gabi. I’m sure, first time ni Venus na makapagbiyahe sa ibang bansa at makapunta sa US dahil kailan lang siya nag-apply ng Philippine passport.
Kung hindi pa nga nag-win si Venus sa Binibining Pilipinas, baka matagalan bago siya makapaglamyerda sa ibang bansa dahil may kaguluhan ang kanyang birth records.
Inihatid si Venus ng kanyang ina sa international airport. Gustung-gusto ng nanay ni Venus na mapanood ang pagrampa ng kanyang anak sa Miss Universe pageant pero dala ng kahirapan, manonood na lamang siya sa TV.
* * *
Natupad na ang pangarap ni Marvin Estrella na maging recording artist dahil available na sa lahat ng SM record bars ang kanyang self-titled album.
The who si Marvin? Siya ang Fil-Am na mahilig kumanta at nag-ambisyon na magkaroon ng sariling album pero natagalan ito dahil tinapos muna niya ang kanyang four-year-college course sa Amerika.
Bagets pa si Marvin nang mag-migrate sa California noong 1992 ang kanyang pamilya. Six years old si Marvin nang ma-realize nito ang hilig at talent niya sa pagkanta.
Masuwerte si Marvin dahil si Vehnee Saturno ang tumutulong sa kanya at composer ng mga kanta sa debut album niya na partly recorded sa California.
Huwag Nang Matapos Pa ang pamagat ng carrier single ni Marvin at composition ito ni Vehnee.
Madalas na pinatutugtog sa mga FM station ang Huwag Nang Matapos Pa at marami ang nagtatanong kung sino ang singer ng bonggang kanta.
Si Marvin lang ang professional singer sa kanilang pamilya. Lawyer ang kanyang tatay na si Danilo at registered nurse naman ang nanay niya na si Lilia. Very supportive ang mga magulang ni Marvin sa bagong career ng kanilang anak.
* * *
Inamin ng isang baguhang aktres na retokado ang kanyang boobs. Hindi ako na-shock sa pag-amin niya dahil hindi siya ang nag-iisang artista na nagpa-overhaul ng dibdib.
Hindi ko muna sasabihin ang name ng newcomer pero tiyak na malalaman ninyo ang kanyang katauhan dahil ginawa niya ang pagtatapat sa harap ng mga television camera!