Lumabas din ang totoong dahilan ng paghihiwalay nina Kris Aquino at James Yap. Hindi na ito bali-balita lang dahil kay Kris na mismo nanggaling na palagi na silang nag-aaway na mag-asawa at ang masama pa ay palagi itong nariring nina Joshua at Baby James. Idinagdag pa ng bagong galing sa bakasyon na mom, na ito ang nagsilbing mitsa para magpasya siyang tapusin na ang kanilang marriage. May pitong buwan na rin silang hindi nagtatabi sa pagtulog ni James at dun sa kuwarto ng mga bata na siya madalas matulog.
Klinaro ni Kris na walang bagong lalaki sa kanyang buhay. Lahat ng mga lalaking inili-link sa kanya ngayon ay mga kaibigan lamang niya, sina Coco Martin, Gabby Concepcion, Robin Padilla, Sen. Chiz Escudero, Mayor Junjun Binay.
Ikinatuwa ng marami at ikinagulat din ang pagbubunyag niya ng posibleng pagtatambal nila ni Senador Chiz sa susunod na eleksiyon, katunayan mayroon na siyang naisip na pangalan para sa kanilang tambalan.
Kung may lalaking masasabing pinakamalapit sa kanyang puso ngayon, ito ay ang kasalukuyang Mayor ng Makati na si Junjun Binay. Matagal na raw silang magkaibigan, matalik na magkaibigan pero nagkalapit pa silang lalo nang magkasunod na mamatay si Tita Cory at ang asawa ng mayor. Magkatulong nilang inalo ang isa’t isa.
Idinagdag din ni Kris na kung sakaling bibigyan niyang muli ng pagkakataong lumigaya ang kanyang sarili sa piling ng isang lalaki, gusto niya ay sa isang katulad ni Mayor Junjun na alam niyang taglay lahat ng katangiang hinahanap niya sa isang lalaki, mabait at hindi siya lolokohin. Bago siya sumalang sa interview kay Boy Abunda ay ipinaalam pa niya kay Mayor Binay ang mga sasabihin niya sa TV tungkol dito.
“Pero matagal pa bago ako magkipagrelasyong muli, kapag alam kong okay na ako at hindi na aatakihin sa puso ang mga kapatid ko,” sabi ni Kris.
* * *
Natuloy na rin ang inagurasyon ng Shinagawa Lasik and Aesthetics Philippines at kasama sa nag-cut ng ribbon sina Senadora Loren Legarda, Congresswoman Imelda Romualdez Marcos, Pops Fernandez at Priscilla Meirelles.
Nagsimula lang bilang isang clinic sa Japan ang Shinagawa nung 1988 at pagkaraan ng halos dalawang dekada, kinikilala na ito bilang pangunahing pangalan sa aesthetic medicine.
Ispesyalidad ng Shinagawa ang paggamot ng byopia, isang visual impairment na kung saan hindi masyadong nakikita ng mga may ganitong sakit ang mga bagay na malalapit sa kanila. Isang ispesyal na lente ang inilalagay sa cornea sa pamamagitan ng prosesong Kamra.
Pagdating naman sa aesthetic medicine, nagtatanggal ang Shinagawa ng stretch marks, fats, freckles, pimples, bakas ng acne at mga abnormal skin pigmentation.
* * *
Maghaharap na rin finally sa isang one on one at exclusive interview ng Showbiz Central sina Claudine Barretto at Mark Anthony Fernandez. Matagal ding parang iniwasan ni Mark ang dating dyowa pero nagkaroon na marahil ito ng sapat na lakas ng loob kaya abangan mamayang hapon ang kauna-unahan nilang paghaharap.
May feature rin kina Jackie Rice sa Story of Your Life at Rhian Ramos sa Don’t Lie To Me.