Invited pala si Jewel Mische sa 7th birthday party ni Lorin Bektas, eldest daughter ni Ruffa Gutierrez na ginawa sa Wack Wack Golf & Country Club last Sunday. Nakita namin ang picture nina Ruffa at Jewel sa Twitter account ni Ruffa na siya mismo ang nag-post.
Magandang senyales ito at kundi kami nagkakamali, hindi ito ang first time na dumalo si Jewel sa family event ng Gutierrez family. ’Katuwa rin na magkasama sina Jewel at Ritchie Paul Gutierrez sa Pilyang Kerubin at mga pulis ang role nila.
Ilang beses na kaming bumisita sa set ng Pilyang Kerubin pero hindi pa namin natitiyempuhang ma-interview sina Jewel at Ritchie Paul.
* * *
Kinikilig at nangingislap ang mga mata ni Jennica Garcia ’pag nababanggit ang pangalan ni Alwyn Uytingco, pero hindi maaming BF niya ang actor. Pati nga si Carl Guevarra na kasabay ni Jennica na guest sa Pilyang Kerubin, natawa sa pakiusap ng aktres na ’wag naming isulat na BF na niya ang actor. Pati status hindi masabi kung “single” o “in a relationship” siya.
Pero sa latest tweet ni Jennica, nakasulat ang buong pangalan ng BF na Cipriano Alwyn Sumulong Uytingco at wala nang isinulat na iba. Itinanggi rin ni Jennica na bad influence sa kanya ang BF dahil mabait ito at hindi siya sasama sa tao kung hahatakin lang siya pababa.
Samantala, nagsimula nang tumakbo ang istorya nina Jennica bilang si Betty at Carl bilang si Carding. Gugulo sa kanila si Iwa Moto bilang si Eva. Taong-baboy si Jennica rito kaya may prosthetic ng nguso ng baboy.
* * *
Laugh trip ang tsika sa amin tungkol sa stage mother, ina ng isang female young star na napapanood sa isang primetime soap. Galit na nagreklamo ang ina ng young star sa staff ng show ng anak dahil bakit daw pinagsusuot ito ng one-piece swimsuit gayung bata pa ito.
Ang katuwiran ng staff, sa beach ang eksena at awkward kung ang young star lang ang hindi naka-swimsuit. Nag-suggest ang staff na hindi na lang isama sa eksena ang young star, pero hindi pumayag ang ina’t mababawasan ang exposure ng anak.
Ang nakakatawa, habang nakikipagtalo si madir sa staff at talagang ayaw pagsuutin ng one-piece swimsuit ang anak, naka-two-piece swimsuit siya. In the end, walang nangyari ang pagtutol niya dahil ang director din ang nasunod.
* * *
Two taping days na lang ang Diva at matatapos na ito sa Friday after 22 weeks of successful airing. Isa sa mga nalulungkot sa pagtatapos ng kantaserye ay si Jaya na gumaganap sa role ni Barang na bestfriend ni Melody (Regine Velasquez) dahil naging close ang buong cast.
Tsika ni Jaya, akala niya dahil soap ang gagawin, iiyak lang siya, pero dito ay nagdrama siya, nag-comedy, at kumanta. Kung magkakaroon ng Book 2 ang Diva, gugustuhin pa rin niyang mapasama at hindi mamamatay ang karakter niya at iba ang namatay.
Magtatapos ang Diva na may bagong MacBook laptop si Jaya na bigay ni Regine bilang giveaway present sa cast. Narinig lang daw nitong nagrereklamo siya sa kanyang laptop at nagulat na lang nang regaluhan siya ng Apple laptop.
“Pinag-isipan niya kung ano ang ibibigay sa bawat isa, kung ano ang kailangan, ’yun ang ibinigay niya. Kaya may binigyan ng bag, shoes, cell phone at kung anu-ano pa.
“Iba talaga si Regine, alam niyang she’s the boss of the show, but the way she handles her co-stars, staff and crew, she’s very giving,” patungkol ni Jaya kay Regine.