Dalawang sexy actress share sa isang dyowa
TRUE : Iniluwal na ni LJ Reyes ang anak nila ni Paulo Avelino nung nakaraang Sabado ng madaling araw sa Amerika.
Nasa New York si LJ kasama ang kanyang ina at kapatid para doon niya isilang ang baby boy nila ni Paulo. Normal delivery ito na may timbang na 7.4 lbs. at pinangalanan nilang Ethan Akio.
Kumpleto sana ang kaligayahan ni Paulo kung nakapunta ito ng Amerika para masamahan si LJ. Pero hindi pa rin ito nakakuha ng US visa hanggang ngayon kaya ginagawan pa rin ng paraan na makakuha ito ng visa para madalaw naman niya ang kanyang mag-ina.
TANONG : Sumakabilang buhay na nga ba ang komedyanteng si Redford White? Iyan ang tanong na gumising sa amin kahapon ng umaga. Kaya kinumpirma namin ito sa ilang taong malapit sa komedyante at totoo nga na pumanaw na si Redford White kahapon ng 6:47 ng umaga.
Matagal nang napabalitang nakaratay sa sakit na cancer ang kilalang komedyante pero minsan ay nakita ito ng isang reporter ng Startalk at mukhang wala naman itong sakit.
Tinanong pa ito ng Startalk reporter tungkol sa balita at pinabulaanan niya ito. Galit na galit pa umano ito sa nagkalat ng naturang balita.
Hanggang sa napabalita na kamakailan lang na mahina na nga si Redford at dinalaw pa ni Eric Quizon nang nandito sa Pilipinas ang actor-director.
Ayon sa naka-post sa Twitter account ni Bubbles Paraiso, cancer of the brain ang sakit ni Redford at nagkaroon na ng kumplikasyon na naging sanhi nang pagkamatay ng komedyante.
As of presstime, hindi pa tiyak kung saang funeral parlor nakahimlay ang mga labi ni Redford. Nasa tahanan muna niya ito sa Quezon City.
Ang amin pong taus-pusong pakikiramay sa pamilyang naiwan ni Redford White.
TOTOO KAYANG nagsi-share sa iisang dyowa itong dalawang sexy actress? Maimpluwensiya at madatung itong si lalaki at sa totoo lang, kaya niyang magkaroon ng mahigit dalawang dyowa pero so far, ang alam namin ay dito sa dalawang sexy actress lang siya nali-link.
Mas maingay si sexy actress P kesa kay sexy actress A na mangilan-ngilan lang ang nakakaalam.
May bagong programa ngayon na kung saan magkasama itong dalawang sexy actress kaya inoobserbahan pa namin kung okay ba ang dalawa.
Sa presscon kamakailan ay hindi sila nagbabatian hanggang sa promo na pinagsamahan nila ay nakikita naming nag-iiwasan sila.
Mas umiiwas si sexy actress A kesa kay P na nakipagtsikahan sa lahat bukod tangi lang sa kanya na parang hindi nag-i-exist sa harapan ng mga tao.
Lalo tuloy kaming nagkamalisya na baka nga totoo ang tsismis nila. Pero ipinangangalandakan na ni sexy actress P na maaaring ikakasal na siya sa lalaking ito kaya paano na si sexy actress A?
TSIKA LANG : Nag-ikut-ikot kami sa ilang SM cinemas kamakalawa ng hapon at nakita naming halos puno ang lagayan ng ticket ng mga sinehan ng Hating Kapatid.
Sa opening day pa lang nito ay sinasabing naka-11 million pesos na. Ayon sa Viva Films, naka-75 million pesos na ang pelikula as of Saturday ng hapon. Congratulations kina Judy Ann Santos, Sarah Geronimo, at sa lahat na bumubuo ng pelikulang Hating Kapatid!
- Latest
