TRUE : Inamin ni Claudine Baretto na totoong dumalaw siya sa set ng Diva nung nakaraang linggo pero hindi para makita si Mark Anthony Fernandez kundi para kay direk Dom Zapata.
“Hindi naman ako bababa ng sasakyan kung nandun siya (Mark Anthony). Meron lang akong ibinigay kay direk Dom, kasi ‘yung location nila, malapit sa pinagteypingan namin. Tinawagan ko muna siya kung sino ang nandun, kaya dumaan ako,” paliwanag ni Claudine.
Tapos na raw ang isyu nila ni Mark Anthony kaya kung sakaling magkita man sila, wala naman daw problema. Hindi lang masagot ng aktres kung okay na ba silang magkasama sa trabaho. “Siguro darating din tayo diyan, pero hindi ko pa masasagot sa ngayon,” pahayag ng aktres.
Katatapos lang ng shooting at pictorial ni Claudine para sa pelikulang In Your Eyes kasama sina Richard Gutierrez at Anne Curtis.
TANONG : Nag-back out daw si Dion Ignacio bilang isa sa mga castaway ng Survivor Philippines Celebrity Edition?
Wala pa namang inilalabas na listahan ng mga celebrity na kasali sa Survivor Philippines na si Richard Gutierrez ang magiging host pero isa sa matunog na kasali ay si Dion. Pero ang latest nga, hindi na raw ito kasali dahil dumating ang kanyang tunay na ama na matagal na niyang hindi nakikita.
Mas gusto raw ni Dion na makasama ito habang nandito sa Pilipinas kaya umatras na ito sa naturang reality show.
Totoo kayang ilan pa sa mga celebrity na kasali ay ang magkasintahang Michelle Madrigal at John Hall? Kasali rin daw sina Ian Batherson at Princess Snell, pati ang socialite-model na si Sollen Heusaff at ang Brapanese model/actor na si Akihiro Sato?
TOTOO KAYANG kilala ang baguhang young actress na ito na burara sa katawan kaya madalas nakikitang hindi nag-aahit ng kili-kili?
Nabigla nga kami nang minsang inangat nitong baguhang young actress ang dalawang braso niya - ang mga balahibo sa kili-kili ang agad na napansin namin.
Kahit anong ganda ng isang babae, turn-off talaga kapag may nakikita kang mga balahibo sa kili-kili. Hindi naman siya foreigner, although may lahing banyaga pero sa Pilipinas naman siya lumaki at dapat alam niyang mas nakakaganda sa isang babae kung makinis ang kili-kili.
Hindi na nagtaka ang ilang nakakakilala sa kanya dahil noong nagsisimula pa lang daw ito sa showbiz ay hindi na talaga ito nag-aahit ng kili-kili.
Miyembro pa naman ng royal family ang name ng baguhang young actress na ito pero hindi malinis tingnan dahil sa mga balahibo sa kili-kili.
TSIKA LANG : Punung-puno ang Cinema 1 ng SM Megamall kamakalawa ng gabi dahil nagkaroon ng advance screening ang pilot episode ng Endless Love nina Dingdong Dantes at Marian Rivera.
Bukod sa main cast ng naturang drama series, dumalo rin ang ilang mga Kapuso stars para suportahan ito, kaya parang premiere night ng isang malaking pelikula ang dating nito na sabi naman nila ay parang pelikula ang bagong serye ng GMA 7 na magsisimula na sa Lunes.
Bukas ay magkakaroon uli ng advance screening sa ilang SM theaters ang Endless Love kasama sina Dingdong at Marian.