Sarah Box-Office Queen uli

MANILA, Philippines - Tinapos muna ni Sarah Geronimo ang mga eksena niya sa pelikulang Hating Kapatid, recording ng theme song at shooting ng musi video ng pelikula nila ni Judy Ann Santos sa Viva Films bago siya umalis ng bansa last week para sa kanyang Record Breaker US Tour.

Kasalukuyan silang nasa San Jose, California at masaya si Sarah sa mainit na pagtanggap sa kanila ng mga Pinoy sa Amerika.

Bago ang Las Vegas, sa San Diego nag-concert si Sarah : “Maraming salamat sa lahat ng mga kababayan namin dito sa San Diego! Sana po napasaya namin kayo sa concert. :)”

Pero ang nakaka-amaze ay can afford ang mga fans ni Sarah na sundan siya sa Amerika para panoorin ang kanyang concert. “Wow! Salamat sa mga popsters na sumunod dito sa Las Vegas!” tweet ni Sarah five days ago.

Kinukuwento rin ni Sarah sa kanyang Twitter account na enjoy siya sa tuwing nagko-concert siya sa Amerika dahil nagkakaroon siya ng chance na mag-shopping at mag-jogging.

Last week of June ang balik ni Sarah ng bansa. Pagdating niya, magiging busy na siya sa promo ng Hating Kapatid. After ng showing ng pelikula nila ni Judy Ann, lalarga naman siya sa provincial concert tour at isasabay ang simula ng taping ng teleserye niya sa ABS-CBN.

Samantala, si Sarah pa rin ang box-office queen ng 2009 sa Guillermo Mendoza Memorial Awards. Ang pelikula nila ni John Lloyd Cruz sa Star Cinema ang may pinakamalaking kinita noong nakaraang taon.

Ka-level ng pelikula nila ng aktor ang mga higanteng Hollywood films tulad ng Transformer, Revenge of the Fallen, New Moon, Avatar at 2012.

“Nagpapasalamat po ako sa lahat ng sumuporta sa pelikula namin ni John Lloyd at sa Guillermo Mendoza Memorial Awards,” sabi ng box office queen ng 2008 at 2009.

Ayaw nang intindihin ni Sarah ang mga intriga dahil alam naman daw niya ang totoo at marami siyang trabahong inaasikaso.

Bukod sa pagiging box office queen, kabi-kabila rin ang product endorsement ni Sarah.