Aktres amoy marijuana ang hininga
Pinaghihinalaan na gumagamit ng marijuana ang isang aktres dahil sa amoy ng kanyang hininga.
Kapwa showbiz personality na pamilyar sa amoy pero hindi marijuana user ang nakaamoy sa hininga ng aktres.
Pinagdududahan na may masamang bisyo ang hitad dahil kung anik-anik ang kanyang mga sinasabi. May mga moment pa na bigla siyang umiiyak ng walang dahilan.
Naloloka ang mga tao na nakakahalubilo ng aktres dahil sa kanyang inaasal at kung hindi maaagapan ang sitwasyon niya, mahihirapan siya na makahanap ng true love!
* * *
May mga tao na hindi nakakaalam na nanalong board member ng Quezon province si Gary Estrada.
Nagtaka pa sila nang marinig nila ang sinabi ni Gary na excited na itong manungkulan sa June 1.
Sa sobrang excitement ni Gary, nakalimutan niya yata na mauupo sa puwesto ang mga bagong halal na opisyal sa July 1 at hindi sa June 1.
Ilang beses na sumubok si Gary sa pulitika at noong nakaraang eleksiyon, pinalad siya na mag-win sa probinsiya nila sa Quezon.
* * *
Acid reflux ang dahilan ng confinement ni Manny Pacquiao sa ospital kaya walang dapat ipag-alala ang kanyang mga tagahanga.
Dinala si Manny sa ospital noong hapon ng Linggo dahil nakaramdam siya ng pananakit ng tiyan.
Pinayuhan si Manny ng kanyang mga doktor na magpahinga ng dalawa hanggang tatlong araw.
Naging busy si Manny sa pangangampanya at malamang na ngayon lamang niya nararamdaman ang stress na dulot ng eleksiyon. Bawing-bawi ang pagod at puyat ni Manny dahil siya ang nanalo sa congressional race sa Sarangani Province.
Si Jinkee ang kasama ni Manny nang dalhin ito sa ospital at ang sey ng GMA News, 2006 nang huling ma-confine ang Pambansang Kamao sa Cardinal Santos Medical Center dahil pa rin sa acid reflux.
* * *
Baka bumiyahe si Manny sa Amerika sa unang linggo ng June. Inaasahan na dadalo si Manny sa event ng Boxing Writer’s Association of America na gaganapin sa New York sa June 4.
Si Manny ang tatanggap ng Sugar Ray Robinson Fighter of the Year Award at ito ang kanyang third fighter of the year award kaya ka-level na niya sina Muhammad Ali at Evander Holyfield. Pararangalan din si Pacquiao bilang Fighter of the Decade.
Dahil sa mga award na matatanggap niya, lalong lumakas ang clamor na labanan ni Manny sa boxing ring ang maligalig na boxer na si Floyd Mayweather, Jr.
* * *
Teka, ano na nga ba ang nangyari sa plano na pagsamahin sa pelikula sina Manny at Sylvester Stallone?
Hindi ko pa nalilimutan ang balita na nagkita noon sina Pacquiao at Stallone para pag-usapan ang movie project na pagbibidahan nila. Parang hindi na matutuloy ang project dahil nabaon na ito sa limot.
- Latest
