Fretzie dili pagawson sa iyang papa

CEBU, Phillipines - Giklaro ni Dr. Dante Bercede, amahan ni “Charming Beauty of Cebu” Fretzie Bercede nga dili na nila ipadayon ang unang tinguha nga pagawson ang ilang anak gikan sa Bahay ni Kuya sa nagpadayon karon nga Pinoy Big Brother Teen Clash of 2010 sa ABS-CBN.

Kini human mikatap sa PBB forum kagahapon nga gihangyo matud pa sa amahan ni Fretzie si Kuya aron pagawson na lamang ang iyang anak. Nangayo og dispensa ang amahan nga Bercede ngadto sa PBB production gumikan sa kahasol nga ilang namugna niadtong Martes sa gabii.

Giasoy niya sa interview sa Banat Hugyaw kagahapon nga apektado ang iyang asawa nga si Kimberly sa mga intriga batok sa ilang anak nga ilang nabasahan sa usa ka Facebook account.

“Nasakitan man gud siya tungod sa mga intriga nga iyang nabasahan about ni Fretzie, usa na ana ang gipanulti ni Tricia (of Davao). Nasakitan gyud siya anang mga intriga nga agbayan, sige lang kuno og gakos-gakos ni Ivan ug Patrick,” pasiuna ni Bercede.

Gumikan niini, nanawag matud pa ang iyang asawa sa PBB niadtong Martes sa gabii kay pahunungon na lang niini ang iyang anak gikan sa maong reality show.

“Wala man gud ko diha pagpanawag niya. Pero na-settle naman mi, ako na nang gibutangan og period nang isyuha. Nanawag nako sa PBB nangayo og dispensa kay nakalitan raman to akong asawa. Nasabutan na namo nga DILI PAGAWASON si Fretzie kay sayang kaayo iyang kahago, naa sad baya na silay contract,” pagtin-aw pa niya.

Para ni Bercede binata ra ang mga aksyon nila ni Patrick ug Ivan ngadto kang Fretzie, walay malisya kung buot hunahunaon.

“Dili man pud gyud na ingon ana nga bata si Fretzie nga mag-una-una. Mosalig na lang gyud ta sa PBB, dili nami manghilabot,” nagkanayon si Bercede.

Dungan niini, nagpasalamat si Bercede ngadto sa tanan nga misalig ug nagpaluyo sa iyang anak.

Paminaw sa dugang katin-awan gikan mismo sa amahan ni Fretzie pinaagi sa OkRyan radio program sa dyLA 909khz., 3-4pm karong hapon.

Xyriel sa Momay

Si Xyriel Anne Manabat  nga nailhan usab sa kadaghanan isip little Agua, maoy bida sa umaabot nga fantaserye sa  ABS-CBN nga nag-ulohan og “Momay.”

Toni ug Mariel gisabong

Nag-atubang karon og intriga si Toni Gonzaga diin matud pa permi niya nga masapawan si Mariel Rodriguez sa programang Pinoy Big Brother Teen Clash of 2010. Wa pa’y gitubag si Toni kalabot sa maong isyu.

Sam mag-usab na

Gisaad ni Sam Milby nga dili na siya magselos sa gipakita nga sweetness nila ni Vhong Navarro ug sa iyang girlfriend nga si Anne Curtis sa set sa Showtime. Gituyo kini ni Sam aron dili na sila maglalis ni Anne.

Rocco makig-level ni Mark

Gibutyag ni Rocco Nacino nga ganahan pud siya makaangkon puhon og kaugalingong dance album sama sa iyang idolo nga produkto usab sa StarStruck nga si Mark Herras.

TV 5 gibalibaran ni Albert

Gibalibaran ni  Albert Martinez ang tanyag sa TV 5 kaniya nga himoon siya og  head sa  film production sa maong network.  Tsika pa sa aktor nga gitagaan niya og  bili ang iyang mga proyekto sa ABS-CBN busa dili siya mobalhin og laing istasyon.

Angkon namo uy!

Kanunay  nga magkuyog sila si Kris Bernal ug  Jay Perillo sa paglaag apan gasige gihapon og deny ang duha sa tinouray nila nga status.

Pilipinas nagmadaugon sa NY Festival

Tulo ka mga pasidungog ang naangkon sa Pilipinas nga naglangkob sa usa ka Silver Medal ug duha ka Bronze Medals sa bag-ohay pa lang nga 53rd New York Festival International Television & Film Awards niadtong Mayo 3 didto sa American Airlines Theatre sa Manhattan.

Ang programang The Correspondents sa ABS-CBN maoy nakaangkon sa Silver World Medal alang sa News Promotion category.

Samtang ang music video sa Dos nga   “Boto Mo, iPatrol Mo” maoy nakaangkon sa Bronze Word Medal alang sa Music video: Low Budget category. Ang maong video nag-awhag sa mga kabatan-onan nga manginlabot alang sa kalinaw ug hapsay nga eleksyon.

Ang documentary special sa GMA-7 nga Planet Philippines hosted by Richard Gutierrez maoy nakabitbit sa  Bronze Medal Award  sa Environment & Ecology category.

Nasayran nga duna pa’y laing tulo ka entries ang Pilipinas ang nakadawat usab og Finalist Certificates sa maong festival, kini naglangkob sa Case Unclosed (“Melissa Roxas”) sa GMA-7, News on Q sa QTV alang sa News Analysis/Commentary category.

Samtang ang The Last Journey of Ninoy sa Unico Entertainment nakadawat usab og Finalist Certificate alang sa Documentary category.

Ang NYF, usa ka International Awards Group (IAG) nga nagsugod niadtong 1958 ug nasayran nga miabot na og 35 ka mga nasud ang misalmot sa maong festival karong tuiga.