MANILA, Philippines - Lalong tumitindi at nagiging kapana-panabik ang mga tagpo sa telefantasyang sinusubaybayan ng mga manonood gabi-gabi sa GMA Telebabad, ang Panday Kids ni Carlo J. Caparas.
Matapos tanggapin ng tatlong bata ang kanilang misyon laban kay Lizardo, ihahanda na sila ni Aureus sa haharapin nilang laban at sisimulan na ang pagsasanay sa Panday Kids.
Una si Oliver (Buboy Villar). Lalabas ang kapangyarihan ng espada sa kanya. Pero sasabihin ni Aureus na kulang pa ang kapangyarihan na ito. Saka maaalala ni Oliver ang kanyang nanay.
Pinipilit ni Lizardo (Marvin Agustin) si Wadi (Arci Muñoz) na sabihin ang kanyang hinaharap. Mapipilitan si Wadi na sabihin na may tatlong sugo ang espada ng Panday para pigilan ang plano niya at puksain siyang muli.
Magkakakilanlan naman sina Ola at Mariang Makiling. Sinundan ni Mariang Makiling si Ola at dahil sa awa niya sa matanda, patutuluyin niya ito sa bahay ng kanyang Tiya Fidela.
Maiisip din ni Rosanna si Oliver. Gusto niyang bumalik si Oliver sa bahay nila ni Ruben.
Malulungkot naman si Hadji dahil maaalala niya si Wendy. Kapag ganap na raw siyang Panday Kid ay hahanapin niya ito at ililigtas sa mga kumuha rito.
Mauungkat din ang buhay ni Charlie pero di agad niya sasabihin kung ano ang pinanggalingan niya sa mga kaibigan.
Magkakapikunan sina Oliver at Hadji ngunit aawatin sila ni Aureus. Magbabati ang dalawa pero kita sa mga mukha nila na gigil na gigil sila sa isa’t isa kaya’t magpapasiklaban sa galing ang dalawang Panday Kids.
Huwag palampasin ang Panday Kids, Lunes hanggang Biyernes pagkatapos ng 24 Oras sa GMA 7.
Andi aahon na!
Ngayong Marso, handang-handa nang umahon at magpakitang-gilas sa top-rating series na Agua Bendita ang newest primetime star ng ABS-CBN na si Andi Eigenmann. Abangan ang kanyang natatanging pagganap bilang dalagang Agua at Bendita. Paiinitin din ni Andi ang Robinson’s Galleria sa March 13 (Sabado) 5:00 pm kasama ang cast ng Agua Bendita para sa kanilang inaabangang mall show. So mali talaga ang bali-balita na aalis siya sa ABS-CBN.