MANILA, Philippines - Umulan ng parangal, saya at sorpresa ang katatapos lamang na MYX Music Awards 2010 na ginanap sa Music Museum.
Big winner ng gabi ang Pop Star Princess na si Sarah Geronimo sa kanyang pagkapanalo ng apat na parangal kabilang ang Favorite Media Soundtrack (Record Breaker), Favorite Remake (You Changed My Life), Favorite Female Artist at Favorite Artist.
Bukod sa paghakot ng awards ni Sarah, naging highlight din ng programa ang paggawad ng MYX Magna Award sa batikang singer-songwriter at isa sa mga Pinoy music icon na si Jose Mari Chan.
Ang parangal ay para sa hindi matatawarang kontribusyon ni Chan sa Philippine music industry. Isang tribute medley ng mga hit songs ni Jose Mari Chan ang inawit nina Jay-R, Richard Poon, Yeng Constantino, Jayson Fernandez of Rivermaya, Rachelle Ann Go, Kean Cipriano of Callalily, at Christian Bautista.
Higit pang lumakas ang hiyawan ng mga fans at maging ng mga guest celebrities nang mag-perform si Rico Blanco. Bukod sa mahusay na pag-awit ng kanyang patok na kantang Ayuz, sinorpresa ng dating frontman ng bandang Rivermaya ang buong Music Museum sa kakaiba niyang paghataw sa pagsayaw na mala-Michael Jackson, ang taas ng energy.
Naganap din sa MYX Music Awards ang isang pambihirang pagkakataon kung saan naging bahagi ng iisang performance ang mga singers mula sa magkakaibang TV networks.
Abangan ang MYX Music Awards sa MYX sa March 6 (Sabado) sa ganap na 7:30 p.m. na may encore telecast sa March 15 (Lunes), 1:30 p.m. at March 19 (Biyernes), 7 a.m.