Cristine Reyes Nahigmata sa Kamatuoran

CEBU, Philippines - Maanyag ug makabibihag, pero daw gikapoy nga Cristine Reyes ang miatubang sa pipila ka mga sakop sa E-Group, atol sa usa ka panihapon niadtong Sabado. Si Cristine maoy celebrity guest sa Metro Gaisano 12 Wishes for Christmas grand draw, diin nahugyaw ang management sa bagang duot sa mga tawo nga miabiba sa actress sa iyang pagtekang sa Metro Ayala, Super Metro ug Metro Colon. Ang Freego Jeans maoy midala kang Cristine dinhi sa Sugbo, sanglit ang dalaga maoy labing bag-o niining product endorser. “Sexy but classy,” kini matud pa ang sumbanan sa Freego Jeans sa ilang pagpili kang Cristine isip endorser karong tuiga.

Pero sa casual interview, pinili ang mga pangutana nga gitubag og tarong sa FHM Sexiest Woman. Kung intriga ang ibato ngadto niya—kung dili niya ipabalik ang pangutana, mokibot ang iyang kilay. Dihang gisukit-sukit kabahin sa tinuod nila nga relasyon nila ni Dennis Trillo, tubag niya wala sila mag-away ug wala sila magbalik. Ug kung “closed book” na ba gyud sila sa actor, matud ni Cristine dili niya matagna ang panghitabo. Pwes, komentaryo sa usa ka editor: “magbalik ra gyud ni sila, love pa nila ang usag-usa.

Hinuon daw sa nabuhi ang dugo ni Cristine dihang gipangutana unsay iyang tan-aw sa kinabuhi human sa nahitabo niya ug sa iyang pamilya atol sa bagyong Ondoy. “Iti-treasure ko na ang mga gamit ko, kasi isang ano ka ng Diyos, wala na.”

Suma ni Cristine nga ang nahitabo niya angay panaminan sa mga kabantan-onan karon nga labhi na ka-liberated. “Siguro ginawa akong instrument para sa mga kabataan, kasi puro kamunduhan na tayo ngayon—liberated na tayo. Kailangan ng faith in God,” niya pa.

Dihang gipangutana kumusta ang iyang relasyon sa Ginoo human sa nahitabo, giangkon ni Cristine nga nausab na siya——mag-ampo na gyud siya bisan unsa niya kadaghan og gimbuhaton.

“Kasi pinalaki ako ng mommy ko sa Born Again, may Sunday school kami. So every Sunday nakaharap ako lagi sa Bible, lini-lecture ng pastor. Ngayon naging busy na ako, nawawalan na ako ng time. Kaya ngayon, nag-pi-pray na ako. Kasi noon, di man ako nag-pi-pray, lagi naman ako sa church,” pasabot ni Cristine.

Kasamtangan niya karong gihimo ang Working Girls ubos sa Viva Films diin pipila sa mga kauban niya sila si Ruffa Gutierrez, Jennelyn Mercado, Bianca King ug Iza Calzado. Suma pa niya nga gipaningkamutan karon nga mahuman ang maong pelikula, sa dili pa siya molarga sa US ug Canada alang sa series of shows karong buwana ug sa Marso. Gani, mag-21 anyos na si Cristine karong February 5, pero wala pa siya masayud unsay kasaulogan niya sanglit may trabaho siya niining adlawa.

Samtang gibutyag ni Cristine nga ang iyang series of shows abroad maoy rason usab nganong wala pa niya masugdi ang iyang Cristine series sa ABS-CBN nga ubos sa direksyon ni Rory Quintos. Suma pa niya nga sa iya na lang pagbalik karong Abril sugdan ang maong proyekto, diin si Zanjoe Marudo maoy una niyang leading man, hangtud nga duna nay lain pang mga actor nga ipares niya sa maong serye. Heavy drama matud pa ang umaabot niyang proyekto hinungdan nga nangandam na pud siya og maayo alang niini. Gani birthday wish niya nga magma-lampuson lang ang rating sa Christine series.