CEBU, Philippines - Madugay pa ang pelikula nila ni Mark Anthony Fernandez ug Claudine Barretto sa Viva Films. Kini gumikan sa ka-busy ni Mark sa pagpangandam alang sa iyang serye sa GMA-7 nga Diva.
Charity work ang tirada
Lahi ang pamaagi nila ni Derek Ramsay ug Angelica Panganiban sa pagsaulog sa umaabot nga Valentines Day gumikan kay usa ka charity work ang ilang buhaton aron makapalipay sila sa ilang isigkatawo.
Christian nakugang sa isyu
Nagpanlingo na lang si Christian Bautista sa isyu nga matud pa dili sila mag-uban ni Jed Madela sa usa ka dressing room sa ASAP XV gumikan sa ilang kompetisyon. Giisip ni Christian ang maong taho nga “stupidest issue in the world” gumikan kay dili kini tinuod ug way igong basehanan.
Aljur nasakitan
Giangkon ni Aljur Abrenica nga nasakitan siya og maayo sa mga negative write-ups nga nagkanayon nga way lami ang iyang pag-arte sa The Last Prince. Tsika pa sa aktor nga isipon niya kini nga inspirasyon aron iyang mapalambo ang maayo niya nga performance sa nahisgutang fantaserye.
In My Life nanghawod sa Tanglaw
Mapasigarbohong gipadayag ni John Lloyd Cruz nga siya maoy nakadaog isip Best Actor sa bag-ohay pa lang nga 2010 Gawad Tanglaw Awards alang sa pelikula niya nga In My Life. Naangkon usab sa nahisgutang pelikula ang Best Director Award ( Olive Lamasan), Best Actress Award (Vilma Santos), ug Best Supporting Actor Award (Luis Manzano).
Goodbye Yaya and Angelina
Hingpit na nga gitangtang sa Bubble Gang ang Yaya and Angelina segment nga gibituonan nila ni Ogie Alcasid ug Michael V. Giingong nangandam ang duha ka mga bida sa bag-o nila nga mga character nga ilang ilusad puhon.
Robin-Toni movie plantsado na
Mobirada na ang pelikula nila ni Robin Padilla ug Toni Gonzaga sa Star Cinema gumikan kay sugdan na ang shooting niini sa katapusang bahin sa Pebrero. Excited na si Binoe sa maong pelikula gumikan kay first time niya nga makauban si Toni sa usa ka proyekto. (Sanden J. Anadia)