Dapat ay matagal nang ginawa ni LJ Reyes ang magpa-feature sa isang men’s magazine. Ngayon pinuputakti siya ng publicity. Ang ganitong pagkakagulo sa kanya ay hindi nangyari maski na nung maging first princess siya sa StarStruck 2, o kaya nung magkarelasyon sila’t maghiwalay ni Alfred Vargas o maski na nung ma-link siya sa isang apo ng isang may-ari ng mga malls na si Mr. Henry Sy. Ngayon nagpa-seksi lang siya, talk of the town na siya?
Siguro nga, mas big time yung pagpapa-sexy niya. Lalo’t sinasabi niyang tatlong taon siyang niligawan ng nasabing magasin bago siya napapayag na magpakuha ng sexy. Malaki nga naman ang nagagawa ng tatlong taon. Mature na siya ngayon, matatag na sa kanyang mga desisyon. At kumportable na siya sa kanyang pisikal na kaanyuan. May gusto pa siyang patunayan at ang pagpapakuha ng sexy ay bahagi lamang ng kanyang paghahanda para rito.