Ejay Falcon, dili epektibo nga endorser!

CEBU, Philippines – Nahiubos diay karon sa bagitong aktor nga si Ejay Falcon ug sa manager niining si Benjie Alipio ang tag-iya sa sabon nga iyang gi-endorso.

Matud sa pamunuan sa Olive-C (sabon nga iyang gi-endorso), nahikurat sila sa ilang pagkasayod nga gidawat diay ni Ejay ang offer aron i-endorso ang produktong Aficionado ni Joel Cruz.

Matud sa tinugyanan sa Olive-C, wala sila magkulang pagpahinumdom sa aktor ug sa manager niini nga basahon og maayo ang kontrata basin aduna sila’y nahimong kalapasan sa ilang pagdawat sa Aficionado endorsement. Pagkakaron, gitun-an pag-usab sa mga tinugyanan sa Olive-C ang kontrata, pagsuta kun wa bay nalapas si Ejay sa ilang kontrata.

Gibutyag sa Olive-C management nga dili sila mausik kun tangtangon nila si Ejay sanglit dili kini, matud pa, epektibo isip endorser sa maong sabon. Kung buot kwentahon, mas gipasikat sa kompaniya si Ejay pinaagi sa mga publicity niini samtang wala kaayo mag-move ang sabon. Lahi sa nangaging endorsers sa Olive-C, kulang matud pa sa paningkamot si Ejay aron ma-promote ang Olive-C, ug gani kanunay kini makalimot og litok sa maong sabon atol sa iyang mga guesting og mga show....

Kahinumduman nga ang endorsement offer sa Olive-C maoy usa sa nagsilbing taytayan ni Ejay aron maabot niya ang iyang status karon. (Rich M. Salibay)