Manliligaw ni Gina Alajar mas bata pa sa anak

Lagot si Geoff Eigenmann kay Gina Alajar dahil binuking sa press na bumisita sa taping ng Rosalinda, na may nanliligaw sa ina na mas bata sa kanya. So, kung 23 years old ang actor, 22 y/o lang ang manliligaw ni direk Gina. Hindi pa masyadong kilala ng binata ang suitor ng ina at ‘di rin nasabi kung pabor siyang magkaroon ng bagong relasyon ang ina.

Tsinika rin ni Geoff na mula nang sumali sa Celebrity Duets 3 si Gina, laging nagpapraktis at bigla na lang bumibirit kahit anong oras na kanyang ikinagugulat. Suportado niya ang ina sa contest, pambawi niya sa suportang ibinibigay sa kanya sa Rosalinda. Pinapanood nito ang soap, tinitingnan kung saan siya may kulang, saka siya binibigyan ng acting tips.

Samantala sa Rosalinda mamaya, muntik-muntikanang magkita sina Rosalinda (Carla Abellana) at Fernando Jose (Geoff), pero si Alex Duran­tes (Jomari Yllana) ang kukupkop kay Rosa­linda. Patitingnan niya ito sa psychiatrist at magpa­patulong kay Natalia (Sheree) para tulungan si Rosalinda.

Papangalanan ni Alex na Paloma Durantes si Rosalinda at gagawing singer. Ipakakanta niya rito ang mga nabiling komposisyon mula kay Fernando Jose na magugulat ‘pag narinig ang kumakanta dahil kaboses daw ng asawa niyang si Rosalinda.

* * *

This Thursday na pipirma ng two-years exclusive contract sa Viva Artist Agency si Jennylyn Mercado at sakop ng kontrata ang movies, recording, concert at commercial. Two albums at two movies ang gagawin niya habang nasa VAA at posibleng madagdagan pa ang projects ngayong katuwang na ni Becky Aguila si Vic del Rosario bilang manager niya.

May gagawin sanang pelikula si Jennylyn sa GMA Films, ang horror flick na Babang Luksa at co-produced ng Reality Films ni Dondon Monteverde. Magawa pa kaya ito ni Jennylyn kung may exclusive contract na siya sa VAA? Tinanong namin ang isang taga-GMA tungkol dito at ang sagot ay baka matuloy pa rin si Jennylyn dahil maganda naman ang relasyon ng Viva Films at GMA Films. Sina Mark Herras at Sunshine Dizon ang iba pang cast ng movie.

Si Mark din ang kapareha ni Jennylyn sa Now That I Have You, ang soap na papalit sa All My Life at eere na this September sa direksiyon ni Joel Lamangan.

* * *

Presscon ngayon ng launching movie sa Regal nina Aljur Abrenica at Kris Bernal na Nandito Ako…Nagmamahal Sa ‘Yo na kinunan sa Bohol sa direksiyon ni Maryo J. delos Reyes.

Bukod kina Kris at Aljur, ang pagdating ni Baron Geisler ang aabangan ng press at tiyak na mauungkat ang nangyaring conflict sa kanila ni Aljur habang nagsu-shooting sa Bohol at ang iba pang happenings ni Baron.

Makikita rin kung may improvement na ang nasunog na right arm ni Kris dahil sa laser treatment. Puwede na rin kayang ikuwento nina Kris at Aljur ang next soap nila sa GMA-7 after All My Life na malapit nang magtapos?

Kanta ni Ogie Alcasid ang Nandito Ako…, at malalaman sa presscon mamaya kung ito rin ang kakanta ng theme song. Sa September 30 na ang showing ng pelikula.

* * *

Hindi naman pala banned sa TV5 si Saab Magalona, gaya nang mga nasulat dahil kasama siya sa cast ng fantasy-adventure na Moomoo and Me na magpa-pilot this Thursday, 8:00pm. Nabalita noon na hindi na kukunin ang sister ni Maxene Magalona dahil naging pasaway sa Lipgloss days, pero heto’t may bago siyang show sa network.