Ngayong nalalapit na ang pagtatapos ng kontrata ni Ehra Madrigal sa GMA 7, marami ang nagtatanong kung wala ba siyang balak na balikan ang network na pinanggalingan niya bago siya naging Kapuso, ang ABS-CBN.
Dahil sa napabalitang disgusto raw ni Nadine Samonte sa hindi magandang takbo ng kanyang career, inaakala rin ng marami na may ganito ring damdamin si Ehra. Pero sinabi ng aktres sa presscon ng Darna, na kung saan ay gumaganap siya bilang isa sa mga kontrabida ng nagbabalik na heroine, na kung siya ang masusunod, mananatili pa rin siyang isang Kapuso.
“Dito na ako lumaki, nakilala at nagkaroon ng mga kaibigan, bakit pa ako aalis at mag-aaral na makisamang muli sa iba, pero mayroon akong manager na siyang nagdedesisyon pagdating sa career ko. Baka naman may iba siyang binabalak, hindi ko alam,” paliwanag ng aktres na gumaganap ng role sa Darna ng isang parang Wolverine.
* * *
Napanood ko yung trailer ng May Bukas Pa na kung saan ay maggi-guest si Dolphy. Hindi nahirapan ang produksiyon na kunin ang serbisyo ng hari ng komedya.
“Napapanood ko ito eh. Hanga nga ako kay Zaijian (Jaranilla, ang batang gumaganap ng Santino) dahil magaling magbitaw ng linya niya. Alam ko magi-enjoy ako na mag-guest dito,” sabi ng hari na gaganap bilang ama ni Moy (Vhong Navarro) na ang tanging hiling ay isang payak na buhay para sa kanilang mag-ama pero, hindi ito nangyari. Para hindi makagulo sa kanyang anak at apo, nagpasya ang matanda na manuluyan sa isang institusyong nangangalaga sa mga matatanda.
Paano mababago ni Santino ang buhay ng mag-ama?
Mapapanood ang May Bukas Pa weeknights sa ABS CBN.
* * *
Nasa limelight na naman ang misis ni Manny Pacquiao, si Jinkee. Iniisip kasi ng lahat na lalabas na naman ang pagiging selosa nito dahil iba-iba ang mga leading ladies ng asawang boksingero sa marami niyang projects na ginagawa sa kasalukuyan. Kayanin kaya nito ang mga most wanted questions ni DJ Mo ngayong hapon sa Showbiz Central?
Si Pia Guanio, makikita ang reaksiyon sa pagli-link sa boyfriend niyang si Vic Sotto sa bago nitong leading lady na si Paula Taylor. Ito kaya ang dahilan ng sumandaling pag-alis ni Pia? Sasagutin niya ito ng live sa Showbiz Central ng GMA 7 ngayong hapon.