CEBU, Philippines – Ubay-ubay ang nahugyaw sa usa ka bahin sa music video ni Dingdong Dantes nga ‘‘Tender Love.’’
Matud pa nga tataw kaayo ang abs sa actor sa dihang iyang gibuhat ang shower scene.
Ang maong video usa sa upat ka music videos sa bag-ohay pa lang nga gilusad, ang ‘‘The Dingdong Dantes Experience,” ubos sa Universal Records.
Bisan wa sa video ang iyang uyab nga si Marian Rivera apan mabatyagan ra gihapon ang presensya niini tungod kay dunay tipik sa video diin gipakita nga nanawag sa cellphone si Dingdong ug ang mirehistro nga initials mao ang “M.R.”.
Giangkon ni Dingdong nga gihimo niya nga inspirasyon si Marian sa dihang gibuhat niya ang maong video ug dunay mga tambag ang dalaga nga iyang gisunod sanglit mas una man nakamugna og music video ang umaabot nga Darna sa GMA-7.
Ang maong audio/visual album dunay pakapin nga mga exclusive photos ni Dingdong, nga wala pa gyud makita sukad-sukad ug dinhi lang maaninaw nunot sa titulo sa aktor isip usa sa Sexiest Men in the World.
Nalakip sa maong album ang ‘‘Cucu (Oh yeah)’’ nga giderek ni Louie Ignacio, ‘‘Shining Star’’ directed by Adrian Calumpang, ‘‘I know You Want Me (Calle Ocho) ug ‘‘Tender Love’’ ni Treb Monteros.
Sulod niining semanaha mapalit na ang “The Dingdong Dantes Experience” under Universal Records lukop nasud. Mapalit kini sa duha ka formats - Book+DVD+CD ug VCD+CD. (Sanden J. Anadia)