Dishwasher yumaman nang gayahin si Michael Jackson
Natuwa ako para kay Rica Peralejo nang marinig ko ang balita na engaged na siya sa kanyang boyfriend na pastor na Joseph Bonifacio ang pangalan.
Sa tingin ko, true love talaga ni Rica si Joseph dahil sampung buwan pa lang ang kanilang relasyon, pumayag na siyang magpakasal.
Witness ako noon sa love affair nina Rica at Bernard Palanca. Ang akala ko talaga noon, silang dalawa ang magkakatuluyan dahil saksi nga ako sa sweetness nila noong magkasama kami sa Singapore.
Nauwi rin sa hiwalayan ang love affair nina Rica at Bernard. Nagpakasal si Bernard kay Meryll Soriano pero nagkahiwalay din sila.
Bilib ako kay Rica dahil kesa magmukmok, ipinagpatuloy niya ang pag-aaral at ngayon, magiging misis na siya. Congrats in advance kay Rica!
* * *
Alam n’yo ba na relihiyoso rin ang tatay ni Rica? Active member ang fadir ni Rica sa isang Catholic religious community.
Tahimik na tao ang tatay ni Rica. Never natin siyang nabalitaan na nakialam sa showbiz career ng kanyang anak. Ipinaubaya niya kay Mommy Alice ang pagpapatakbo sa career ni Rica. Hindi naging stage father ang ama ng aktres.
Kita n’yo naman, kasing religious din ng tatay niya ang mapapangasawa ni Rica. Pastor si Joseph ng Victory Christian Fellowship Church na pinupuntahan ni Rica. Nagkakilala ang dalawa sa church na iyon at dito nabuo ang kanilang love affair.
* * *
Matagal na kaming hindi nagkikita at nagkakausap ni Mommy Alice. The who si Mommy Alice? Siya ang karakter at palaban na nanay ni Rica.
Type ko si Mommy Alice dahil nakita ko kung paano niya ipaglaban ang kanyang anak. Talagang nakikipag-away si Mommy Alice sa mga detractors ni Rica noon.
Pero low-profile na ngayon si Mommy Alice dahil nakakapagdesisyon na si Rica para sa sarili. Graduate na siya sa pagiging stage mother pero cute ang kanyang pagiging stage mother dahil hindi lumalampas sa limitasyon si Mommy Alice!
* * *
Kamukhang-kamukha ni Michael Jackson ang kanyang Chinese impersonator na dating dishwasher.
Malaki ang utang na loob ng dishwasher kay Michael dahil gumanda ang takbo ng kanyang buhay mula nang gayahin niya ang King of Pop.
Nakakalokang malaman na galing pala sa pinagsamang pangalan nina Michael Jackson at Gary Valenciano ang screen name ni Michael V.
Kailan ko lang nalaman na fan pala si Michael V. nina Michael at Gary. Kita n’yo naman, isa na ngayon si Bitoy sa mga superstars sa local showbiz.
Tahimik lang si Michael V. pero kasali siya sa listahan ng Most Powerful People sa showbiz at nagre-rate ang lahat ng kanyang mga programa.
- Latest
