Taw-an nga Villa Estrella

CEBU, Philippines – Gikahinaman nila ni Jake Cuenca ug Shaina Magdayao ang paggawas sa pelikula’ng Villa Estrella, sanglit mao kini ang unang pelikula nga horror nga ilang gihimo kauban ang usag-usa.

Sa dihang nahinabi sa Cebu Entertainment Group ang duruha niadtong Huwebes, diha sa Cebu Parklane International Hotel, pareho kining nagkanayon nga dili kasarangan ug talagsaon ang tema sa maong pelikula tungod kay dili man law-ay ang mga hulagway sa mga karakter niini. “Very different, kasi napaka-natural ‘nong acting namin, at may touch of reality ‘yong set,” paambit pa ni Shaina sa E-group.

Dungag pa ni Jake nga excited ug malipayun kaayo siya sanglit mao kini ang labing una’ng pelikula nga siya ang lead star. “Excited talaga, and different siya from my teleseryes kasi iba ‘yong acting sa TV, iba din ‘yong sa movie,” matud pa sa actor. Si Jake magdala sa papel isip Alex nga kanhi nanag-iya sa gugma ni Ana (Shaina), nga   mamahimong hinigugma ni Dennis (Geoff).

Ang Villa Estrella usa ka istorya sa upat ka managlahing personalidad nga pareho’ng nakigbisog sa kinabuhi sa gugma, nga naabot sa usa ka lugar diin dunay mga nag-atang nga uhaw nga mga kalag nga muhikaw sa tagsa-tagsa nila ka kalipay. Ang maong pelikula nga ubos sa Star Cinema mopahinumdum ug mohatag pagtulun-an kanato nga ang matag lugar, adunay nagpahiping tinaguan. Ubos kini sa direksyon ni Rico Ilarde.

Lakip sa karakter sa maong horror film mao sila si, Maja Salvador, Geoff Eigenman, John Estrada, John Arcilla, Ronnie Lazaro, Celine Lim ug Rubu Rubi, nga buksan na karong Hulyo 01, sa tana’ng sinehan nationwide.