Mama Salve, nakakapangilabot ang nangyari kay Ruby Rose Jimenez, ang kapatid ni Rochelle Barrameda na dalawang taon nang nawawala at nang matagpuan eh nakasilid sa drum ang walang buhay na katawan.
Natatandaan ko na maraming beses na nagpainterbyu at nag-guest si Rochelle sa Startalk dahil sa paghahanap niya sa nawawalang kapatid.
Naikot na yata ni Rochelle ang lahat ng mga talk show pero hindi rin na-locate ang kinaroroonan ni Ruby.
Noong Miyerkules, natagpuan ng mga pulis ang bangkay ni Ruby sa dagat ng Navotas. Nahirapan ang mga pulis na buksan ang drum dahil binuhusan ito ng semento at iniligay din ang drum sa steel case na binuhusan din ng semento.
Nakakaloka ang natuklasan ng mga pulis nang mabuksan nila ang drum. Nakaposas ang bangkay ni Ruby at diumano, dumaan ito sa matinding torture. May report ang mga pulis na bukod sa torture, pinatay ang biktima sa pamamagitan ng sakal.
Kasumpa-sumpa ang ginawa sa kapatid ni Rochelle kaya humihingi ng katarungan ang kanyang mga naulila.
Eh pagkaganda-gandang babae ni Ruby, base sa mga litrato niya na ikinalat nina Rochelle noong hinahanap nila ang nawawalang kapatid.
Ikinuwento ni Rochelle na battered wife si Ruby at ang asawa nito ang pinagbibintangan nila na pumatay sa sariling asawa.
Iyak nang iyak si Rochelle mula pa noong Miyerkules. Hindi niya matanggap ang nangyari kay Ruby. Humihingi siya ng tulong sa lahat ng puwedeng makalutas sa kaso ng pagkamatay ng kanyang kapatid.
Nakaburol ang labi ni Ruby sa Funeraria Paz sa Parañaque City. Hindi pa napagdedesisyunan ng pamilya niya ang araw ng kanyang libing.
* * *
Nakuha ang bangkay ni Ruby sa dagat ng Navotas. May napagkuwentuhan si Rochelle na may negosyo sa Navotas ang asawa ni Ruby na Manny Jimenez III ang pangalan.
Nag-deny na ang abogado ni Manny. Wala raw kinalaman ang kanyang kliyente sa pagkawala at pagpaslang kay Ruby.
Tinututukan ng marami sa mga kababayan natin ang kaso ni Ruby dahil gusto nilang malaman ang dapat managot sa pagpatay sa biktima.
* * *
Guest namin bukas sa Startalk si Atty. Adel Tamano, ang abogado ni Dra. Vicki Belo. Si Atty. Tamano ang magsasalita tungkol sa demanda ni Katrina Halili laban sa kanyang kliyente.
Panoorin ninyo bukas ang Startalk para malaman n’yo ang saloobin ni Mama Vicki sa eskandalo na hindi mamatay-matay at patuloy na pinag-uusapan, kesehodang kinasasawaan na ang isyu.
* * *
May special participation si Alfred Vargas sa Zorro. Nag-taping na siya noong Miyerkules sa Bagac, Bataan.
Maganda ang role kaya tinanggap ko ito para kay Alfred. Pirata ang gagampanan niya sa show na pinagbibidahan ni Richard Gutierrez. Matagal nang hindi napapanood si Alfred sa mga TV show na pambata kaya excited na excited siya sa kanyang role sa Zorro.