Sa Linggo na ang babang-luksa para kay Rudy Fernandez. Isang misa ang gaganapin sa Heritage Park sa June 7 para sa 1st death anniversary ni Daboy.
Araw ng Linggo ang death anniversary ni Daboy pero lalabas ako ng bahay, alang-alang sa kanya. Ito ang bihirang pagkakataon na lalabas ako sa araw ng Linggo.
Pagkatapos ng misa, pupunta si Lorna Tolentino sa Middle East dahil dadalo siya sa special screening ng Katas ng Saudi para sa mga OFW.
Nakaka-relate ang mga OFW sa magandang kuwento ng Katas ng Saudi dahil may kinalaman ang kuwento nito sa buhay ng mga OFW.
* * *
Mabilis na nakarating sa akin ang balita na nag-file na kahapon ng demanda si Yasmien Kurdi laban kay Baron Geisler.
Sariling desisyon ni Yasmien ang pagdedemanda. Maliban sa kanyang abogado at pamilya, walang sinabihan si Yasmien na ipapa-blotter niya sa PNP si Baron.
* * *
Usung-uso ang demandahan. Hindi lamang si Yasmien ang nagdemanda kahapon. Ibinalita kahapon sa radyo na idedemanda rin ni Hayden Kho, Jr. si Abner Afuang.
The who si Abner? Siya ang dating pulis ng Makati at mayor ng Pagsanjan na nagbuhos kay Hayden ng tubig sa senado noong isang linggo.
Unjust vexation ang kaso na isinampa ni Hayden laban kay Afuang na nag-dialogue na dapat mawala sa mundo ang mga tulad ni Hayden. Ang balita na nakarating sa akin, isinampa ni Hayden ang kaso sa Pasay City Regional Trial Court dahil sakop nito ang pinangyarihan ng insidente.
* * *
Kahapon din lumabas ang balita na idinemanda si Aljur Abrenica ng isang kinse anyos na babae na nakilala niya sa Puerto Galera noong April 2009.
Wala pang reaksiyon si Aljur sa kaso na isinampa ng bagets na may pangarap daw na maging artista.
Kumunsulta na si Aljur sa abogado na magtatanggol sa kanya laban sa asunto ng bagets.
* * *
Maingay ang tsismis na babalik na si Cristine Reyes sa GMA 7 pero wala pang kumpirmasyon mula sa kanyang kampo.
Nag-umpisa ang showbiz career ni Cristine sa GMA. Nag-ober da bakod siya sa ABS-CBN at naging bida sa TV remake ng Eva Fonda.
Hintayin na lang natin ang pagsasalita ni Cristine dahil siya lang ang puwedeng makapagkumpirma tungkol sa kanyang pagbabalik sa Kapuso Network.
* * *
Dalawang bagong show ng GMA 7 ang mag-uumpisa sa Lunes, ang Adik Sa’Yo at Ngayon At Kailanman.
Ang Adik Sa’Yo ang ipapalit sa timeslot ng All About Eve na magwawakas sa Biyernes. Kasali si Alfred Vargas sa cast ng All About Eve. Looking forward si Alfred sa pagtatapos ng kanilang show dahil magkakaroon na siya ng oras na maasikaso ang kanyang farm sa Bulacan. Naging busy si Alfred sa mga taping kaya bihira niyang madalaw ang kanyang farm na may mga tanim na gulay at mga puno ng mangga.