Nag-text sa akin si Vina Morales para sabihin lang na birthday ng anak niya, isang buwan na ito. Aba talagang nanay na nanay na ang dating niya. Siguro kapag nag-resume na siya ng kanyang trabaho at papayagan siya ng kanyang doktor na dalhin ito, baka kahit na saang lugar siya mag-taping, mag-shooting at mag-concert ay dadalhin na niya ang anak niya. Kapag nangyari ito, maaga pa ay talagang mahihilig na ito sa pag-aartista.
Samantala, giliw na giliw naman si Shaina Magdayao sa kanyang bagong pamangkin. Bagaman at marami na itong pamangkin sa mga kapatid niyang sina Shiela at Sheryl ay parang sabik na sabik pa rin ito sa kanyang pamangkin kay Vina. Siguro dahil pinaka-baby ito sa pamilya nila.
Napapansin n’yo ba, ang dami-daming billboards ni Shaina sa Edsa? Napaka-in demand nitong endorser. At tingnan n’yo siya, bakas na bakas sa kanyang mukha ang kanyang very happy lovelife. Mukhang sila na talaga ang magkakatuluyan ni John Prats.
* * *
Talaga bang magiging bahagi na ng buhay natin yang mga sex video? Kasagsagan pa ng sex video scandal nina Dr. Hayden Kho at Katrina Halili pero heto ang balita na meron na rin daw sex video ang PBB Teen finalist na si Robi Domingo, isa sa mga star ng Boystown at miyembro ng Gigger Boys.
Siyempre nag-deny si Robi sa existence ng video na sinasabing hindi babae ang kasama niya kundi isang bading.
“Basta ako, wala akong natatandaang nakipag-relasyon ako sa isang bading kaya hindi puwedeng magkaroon ako ng sex video, puwera na lamang kung dinaya ito,” sabi niya.
* * *
Nag-host nga pala ako ng isang masayang birthday party para kay Mama Nene Vera-Perez sa Teatrino, Greenhills at talaga namang nagkatuwaan ang lahat na balik-balikan ‘yung masasayang araw nila nun.
Ninety two years old na ang may kaarawan.
Nagkaroon ng isang ispesyal na pagtatanghal sa Teatrino para kay Mama Nene. Kumanta si Pilita Corrales at Dulce. Nagpamalas naman ng isang dance number ang teenstars sa saliw ng paboritong kanta ng may kaarawan, ang Amapola. Nag-perform din sina Rafael Centenera, Enrique Marcos, Jackielou Blanco at John Nite. Pinaka-riot si Elizabeth Ramsey na nagagalit dahil bakit hindi raw siya ang nagustuhang i-video ni Hayden Kho.
Enjoy ang lahat na kinabibilangan nina Susan Roces, Amparo Lucas, manood ng isang palabas na musical at nagtatampok din kina Susan Roces at Amparo Lucas, Sarah Calvin, Pepito Rodriguez at Tats Faustino.
Salamat nga pala kay Tats dahil kahit gahul siya sa panahon ay napagbigyan niya ang request ko na gawing medley ang mga awiting Maalaala Mo Kaya, Hindi Kita Malimot at Dahil Sa Iyo na inawit ng lahat during the finale. Hindi napigilan ng may kaarawan na tumayo sa kanyang kinauupuan para sumama sa pagkanta ng lahat. Nagalit pa nga ito nang matapos ang programa dahil gusto pa raw niyang kumanta.
Dumating din at nakisaya sina Speaker Jose and Gina de Venecia.
Salamat nga pala sa may-ari ng Teatrino Greenhills na si Precy Florentino.