Writer ng Pinakamaganda... kinalimutan ni Direk Celso

Na-sad naman ako for my ‘kafatid’ Iskho Lopez. Hindi man lang siya naalalang tawagan ni Direk Celso Ad Castillo para magpasintabi na ibebenta niya ang kuwento ng Ang Pinakamagandang Hayop sa Balat ng Lupa noon sa Regal Films (si Ruffa Gutierrez and bida) at ngayon ay sa GMA 7 na si Ehra Madrigal naman ang gaganap.

For the record, si Iskho na kasalukuyang news editor ng isang broadsheet ang isa sa may akda/ nagsulat ng kuwento ng nasabing pelikula kasama si Rafael Ma. Guerrero na si Gloria Diaz ang unang bida kasama sina Vic Vargas, Elizabeth Oropesa, Ray Marcos, Lito Anzures, Pedro Faustino, Mario Escudero, Ruel Vernal, Ellen Esguerra, Babsy Paredes at Flordeliza.

Hindi naman siya actually naghahabol, pero sana naman bilang courtesy sa mga nagsulat, ano ba naman ‘yung tawagan sila para man lang sabihin na ibebenta na naman ang nasabing pelikula na unang ipinalabas noong 1974.

* * *

Nakakatakot ang swine flu, ang epidemyang kumakalat sa buong mundo na napuro ang Mexico at Amerika.

Sa Mexico pa naman sana planong mag-honeymoon ng bagong mag-asawang sina Judy Ann Santos at Ryan Agoncillo.

At hindi kaya afraid ang ilan nating pulitiko na dumayo sa Amerika para manood ng bakbakan nina Manny Pacquiao at Ricky Hatton sa May 2 (May 3 sa bansa)? Eh di ba, maraming Mexicans ang fanatic ng boxing na tiyak ding manonood sa nasabing laban? Siyempre nakakatakot dahil baka meron isang magdala ng virus.

Nasa New York din ang grupo nina Governor Vilma Santos kasama ang kanyang pamilya para sa shooting ng A Mother’s Story kung saan meron ding kaso ng swine flu.

Sa mga naunang nabalitang isinugod sa hospital sa Amerika na may swine flu, marami sa kanila ang galing sa New York.

Bukod sa pamilya ni Governor Vi, kasama nila si John Lloyd Cruz.

Pray na lang tayo na matapos na ang nasabing epidemya na kumakalat sa buong mundo.