Confirmed na ikakasal sina
Judy Ann Santos
at
Ryan Agoncillo
sa May 2. Hindi natuloy noong April ang kasalan dahil nakinig sila sa Feng Shui.
Matagal nang pahulaan ang petsa ng kasal nina Juday at Ryan pero walang makapagsabi. Ang hula nga ng marami, isasabay sa birthday ni Judy Ann sa May 11 ang kasal pero napaaga ito. Thirty one years old na si Juday sa kanyang coming birthday. Isang taon ang tanda ni Juday kay Ryan dahil 30th birthday nito noong April 10.
Sure ako na mag-uunahan ang mga showbiz talk shows sa paghahanap ng mga impormasyon tungkol sa nalalapit na kasal ng future husband and wife.
Good luck sa mga researchers dahil alam nating lahat na tikom ang bibig ng pamilya at mga kaibigan nina Ryan at Juday. Nag-promise sila na hindi magsasalita dahil na rin sa pakiusap ng showbiz couple.
* * *
Palapit na nang palapit ang araw ng paghaharap nina Manny Pacquiao at Ricky Hatton.
Sa May 2 na ang kanilang laban sa Las Vegas pero May 3 ito mapapanood sa Pilipinas dahil malaki ang agwat ng oras natin sa Amerika.
Maraming big event sa May 2 ha? Kasal nina Juday at Ryan, laban nina Manny at Ricky.
Ipinagdarasal ng mga kababayan natin na manalo si Manny at nag-wish sila na bawasan ni Manny ang mga event na pinupuntahan niya para makapag-concentrate siya sa training.
Ang dami-dami raw kasing extra-curricular activities ni Manny na nakakaapekto sa training niya sa Wildcard Gym. Huwag daw sanang maging komportable si Manny dahil iba si Ricky kay Oscar dela Hoya na tinalo niya noong December 2008.
* * *
Hindi ko pinag-iinitan ang buhok ni Pauleen Luna pero totoong ako ang may gusto na magpagupit siya para maiba naman ang kanyang itsura.
Importante sa mga artista ang i-reinvent nila ang sarili para hindi sila kasawaan ng kanilang mga tagahanga.
Hindi ako mahilig sa pamahiin pero naniniwala ako na nagbabago ang takbo ng suwerte ng tao kapag nagpapagupit sila.
Eh ilang taon nang mahaba ang buhok ni Pauleen kaya dapat na siyang mag-experiment ng bagong hairstyle. Kita n’yo naman, bagay sa kanya ang maigsing buhok dahil lalong napansin na pumayat siya.
* * *
Malapit nang mag-umpisa ang taping ng teleserye na pagbibidahan ni Lorna Tolentino sa ABS-CBN.
Makakasama niya sa teleserye si Gabby Concepcion na ilang beses nang nakapareha ni LT sa pelikula.
Pinaghahandaang mabuti ni LT ang pagbabalik sa telebisyon dahil alam niya na matagal nang naghihintay ang kanyang mga tagahanga.
Mga e-mail ng papuri sa acting ni LT sa Maalaala Mo Kaya ang mga natatanggap ko mula sa kanyang fans. Talagang excited na raw sila na mapanood si LT sa primetime. Sandali na lang ang ipaghihintay nila dahil mag-uumpisa na ang taping ng bagong TV series ni LT sa ABS-CBN.
* * *
Ngayon ang umpisa ng Goma Cup sa Boracay. Mag-expect tayo ng hot issues tungkol sa mga artista na invited sa Goma Cup at kasalukuyang naglalamiyerda sa Boracay.
Maraming reporter ang invited para i-cover ang Goma Cup kaya hindi malilingid sa kanilang kaalaman ang mga mangyayari doon.