Zorro ug Bro: Tigi sa primetime

At long last, some good things came out of Philippine primetime television. Gisugdan ni sa “May Bukas Pa” ni Zaijan Jaranilla (isip Santino). Ug sa miaging gabii, giparangan kini sa “Filipinized version” sa kasaysayan sa masked avenger nga si “Zorro”.

Bisan og usahay makasapot ang paglikoylikoy sa kalamboan sa istorya sa May Bukas Pa nga tan-aw nako anggid sa “Marcelino: Pan y Vino”, makatandog natong mga nagpakabuhi ning Kristohanong katilingban ang mga eksena diin usa ka inosenteng bata ang mointerbener alang sa pagdagayday sa kalooy ug grasya ni “Bro” ngari natong masalaypon. Simple ang mensahe: Paradise lost, paradise regained. Pagkabugto sa atong relasyon sa Ginoo, apan pagpasig-uli niini pinaagi sa Iyang kaaghop.

Ug kay ang Zorro usa man sab sa mga mahinungdanong sugilanon sa sayong bahin sa ika-19 nga siglo, may dakong pinsinganay nga nahitabo niadtong Lunes sa pilot telecast sa Zorro tali sa mga nanga-“ungo” sa May Bukas Pa ug niadtong interesado sa kasaysayan sa Pilipinas ubos sa mga Katsila, labi na gyod ang tigi tali sa mga Indio ug mga Illustrado.

Ang labing unang bersyon sa Zorro mao ang “The Curse of Capistrano” nga naghatod sa sobra 65 ka adaptations niini – mapabasahon man o mapapelikula, gihubad ngadto sa 26 ka pinulongan. Kining tagsulat moangkon nga usa sa mga “naungo” sa Zorro. Usa kos mihugop sa sinehan sa dihang gipasalida ang Zorro dinhi niadtong 1998, sa ulohang “The Mask of Zorro”, gibidahan ni Antonio Banderas isip Alejandro Murrietta samtang si Anthony Hopkins maoy midala sa papel ni Don Diego de la Vega, ang hamtong nga Zorro.

Niadtong Lunes, milurat akong mata sa kabongga sa produksiyon nga may consultant pa gyod dili lamang sa sinultihang Espanyol kundili lakip na sab sa historical accuracy. Hugyaw ang mga sapot sa cast nga gipatuyo pagpatahi (take note: dili hinulaman, dili inabangan). Mo-bow kos research works sa creative team diin hangtod sa lighting migamit sila’g sulo aron makab-ot ang authentic lighting effects aron matinud-anon ang dagan sa istorya nga nahitabo sa Spanish colonial times.

Nakakablit og pagtagad ang kabililhon sa tangible heritage conservation sa usa ka compound sa Bagac, Bataan isip major location sa shoot sa Zorro. Maayo na lang gani dunay mihatag og dakong bili sa pagpreserbar sa mga butang ug istruktura nga may kalabotan sa usa ka panid sa atong kasaysayan. Tan-awa, nagamit gyod kini sa period/epic teleserye.

Markado ang acting performances nilang Mark Gil ug Leo Martinez. Wala pa kaayo mopakita’g buylo silang Joel Torre ug Jaclyn Jose. Sayo pa hinoon aron hukman kun matinud-anon ba sab ang portrayal ni Richard Gutierrez isip Antonio nga pag-umangkon ni Don Diego, pero in fairness, markado ang iyang paningkamot nga makakat-on og fencing ubos ni Benny Garcia, coach sa Philippine Fencing Team. Samtang angayang atangan ang kalamboan sa karakter nilang Michelle Madrigal ug TJ Trinidad. Kun kahatagan lang og lain pang saktong proyekto, daghang artistang babaye ang mayatakan ni Michelle tungod sa dakong improvement sa iyang pag-arte. Siguradong lupigon niya lakip ang iyang maguwang nga si Ehra. Makamao na si Michelle mogamit sa ekspresyon sa iyang mga mata aron i-establisar ang emosyon sa iyang karakter. Mas minggilaw pa ang acting ni Michelle niadtong Lunes kay ni Rhian Ramos isip Lolita Pulido nga dako ang exposure ning maong teleserye. Ingon man si TJ, mas na-internalize niya ang iyang karakter (ang antagonistang si Ramon Pelaez) hinungdan nga convincing ang iyang pag-emote ug maayo na sab siya’g timing when it comes to delivering his lines/spiels.

Trivia: Buot ipasabot sa Zorro kay “lobo” kon fox. Sugilanon kini sa usa ka nagmaskarang kabalyero nga nakigbatok sa mga mapahimuslanong mga pangulo sa pueblo sa Los Angeles ubos sa pangagamhanan sa Espanya. Ang tinooray nga Zorro sa Philippine franchise mao si Jomari Yllana isip Don Diego de la Vega. Anak siya og adunahan, usa ka asyendero. Apan mas gipili niyang pakigbatokan ang mapahimuslanong rehimen pinaagi sa iyang pagtakuban isip Zorro. Sibo sa prangkisa, ang karakter ni Jomari milawig latas sa kadagatan alang sa pagpakighimamat ni Antonio, ang iyang pag-umangkon, dinhi sa Pilipinas. Ug itudlo niya ang iyang katakos sa fencing, kaigmat ug kalantip ngadto sa manununod nga Zorro. Ang Zorro, nga unang milugwa niadtong 1919 (kaedad diay nis The FREEMAN), bunga sa imahinasyon ni Johnston McCulley.