PSN Showbiz

Carcar X-freeze: Dancing Like There's No Tomorrow

March 25, 2009 | 12:00am

Nagbaha karon ang nagkadaiyang modern dance group sa Cebu. Nagkalain-laing mga tirada ang ilang gihalad aron lang malingaw ang manan-away.

Karon adunay usa ka grupo nga nagbase sa dakbayan sa Carcar nga gitawag og X-freeze. Gilangkuban kini og 15 ka mga batan-ong lalake nga hanas sa natad sa pagsayaw.

Matawag nga “coalition” ang maong grupo kay ang mga sakop niini nagagikan niadto sa laing dance group nga gusto mapalapdan ang ilang potensyal sa pagsayaw.

“Usa ka member sa laing group nga J-Frags ang nakahunahuna nga moporma og grupo, busa nangita gyud dayon mi og mga dancers sa Carcar ,maong naporma dayon ang X-freeze,” butyag pa sa usa ka sakop sa maong grupo nga si Julius dinhi sa Banat Hugyaw.

Gitawag sila og X-freeze sanglit maka-kaging man sa mga manan-away ang ilang mga makahugyaw nga steps sa higayon nga mosayaw na sila sa entablado. Wala huna-hunaa sa maong grupo ang kompetensiya kay ang importante kanila nga ilang mapakita sa uban ang ilang talento.

“Dili man gyud ingon nga kuwarta among giapas kung mangapil mi og contest. Basta makasayaw lang me, ug malingaw ang mga tawo nga manan-aw okay na kay na namo,” padayag pa ni Julius.

Kung buot huna-hunaon mas dako ang ilang gasto sa ilang plitehan kung mangadto sila sa ubang dapit aron manayaw, pero wala nila kini panumbalinga gumikan kay dili sila buot ihinakog ngadto sa publiko ang talento nila sa pagsayaw.

Alang kanila, ang pagsayaw maoy maka-relax kanila sa higayon nga makasugat sila og mga problema.

Paambit pa nila sa mga batan-on nga mahiligon og sayaw, kinahanglan nga open -minded ka aron dili ka makalitan kung dunay mga suggestions ang imong mga kaubanan.

Dugang pa nga importante sa usa ka dancer ang mobuhat og saktong konsentrasyon sa steps panahon sa praktis aron dili makahatag og labad sa iyang mga kaubanan.

“Sa among grupo, naa gyud permi ang pagtinabangay, naa gyud na permi sa among huna-huna nga gusto gyud mi makapalingaw sa mga tawo,” panapos pa ni Julius.

X-Freeze Members

Julius 23

Jerome 22

Bryan 21

Mike 18

Denver 17

Joey 17

Archel 17

Arche 17

Ken 18

Kevin 20

Raymund 20