Para sa Magtatapos

MANILA, Philippines - Panahon na naman ng mga pagtatapos o graduation sa mga paaralan sa bansa at bilang alay sa mga kabataang nagsunog ng kilay upang tumanggap ng katibayan o diploma’y isang natatanging pagtatanghal ang handog sa kanila ng Life and Style with Ricky Reyes sa QTV-11 ngayong Linggo mula alas-diyes hanggang alas-onse ng umaga.

Rarampa ang Starstruck Survivor na si Ryza Cenon at mga host ng KaBlog na sina Ada Flores at Lucky Mercado ang mga kasuotang likha ng pamosong designer na si Armand Rimojo at Missology. Tiyak na kapag ang mga bonggang formal wear na ito ang isinuot ng sinuma’y mamumukod-tangi sila at hahangaan ng balana.

Magniningning naman ang mga modelo ng mga sikat na hair and make up artist na opisyal ng Fil-Hair Coop na sina Pening de Guzman (ng Antipolo), Atlas Leonen (Pasig) at Enji Doblois (Pampanga) sa Great Hair Day na ang itatampok ay Graduation Ball look.

Simula ng We (Women Empowerment) na pagpupugay sa mga Filipina ng Luzon, Visayas at Mindanao na ang host ay si Marikina City Mayor Marides Fernando. Sa segment na Hairecord ay pipiliting talunin ng mga taga-Iloilo City ang fastest national record na 75 gupit sa loob ng 4 na oras na natala nung isang buwan sa General Santos City.