CEBU, Philippines - Biyaan na ni 5th Pinoy Dream Academy Season 2 Scholar Van Louelle Pojas a.k.a. Van Roxas ang showbiz para humanon ang usa ka tuig nga kursong License Practical Nurse sa U.S.A karong Mayo.
Mao kini ang gibalita sa iyang amahan nga si Lemuel Pojas atol sa Kapamilya Caravan diha sa Robinson’s Mall kagahapon. Matud pa, di na mapadayun ni Van ang iyang pagtuon sa Cebu Doctors University diin nagkuha og kursong Physical Therapy, hinungdan nga mukuha kini og laing kurso nga kalinya ra gihapon sa medisina.
Gipaabot nga muhatag og dugang katin-awan ang manager ni Van nga si Mario Colmenares kalabot niining maong kalambuan sa dili madugay. Kini tungod kay mipasidaan na si Colmenares sa Banat Hugyaw nga duna siyay “major announcement” nga luwatan duha ka semana gikan karon.
Gikagubtan
Nag-fiesta gyud ang mga female fans ni Van sa dihang milugwa ang status niya sa Facebook nga: “Van Louelle went from being ‘married’ to ‘single’.” Matod pa sa nakuhang impormasyon sa Banat Hugyaw gikan ni Colmenares nga usa kadakong fake ang maong account pero gitino ni Van kagahapon nga tinuod nga wala na siya’y uyab karon.
“Yes, I’m single. Okey raman ko. Dali raman ko nakarecover,” pong pa sa maong singer. Two years na silang mag-on sa kanhi niya uyab ug “misunderstandings” niya pa ang dakong rason sa ilang panagbuwag.
Ang tubag ni Van sa pangutanang, giunsa niya og handle sa iyang kasikat: “Be humble always, tagad-tagad ba. Wa ko kabaw nga sikat nako! Hahahaha! Kung managed (ang tawo) tagdon pud nako.”
Pong pa sa iyang amahan nga wa gyud mausab si Van, nagpabilin kining mapaubsanon ug walay libog nga anak. Hinuon tungod kay bag-o pa kini sa music industry, nagtabang-tabang na kini sa pamilya.
Ug kabahin sa issue sa iyang Mama nga kontra sa pag-join ni Van sa PDA: “Naa lang gyud to’y reason iyang mama ba. Gusto gyud to makahuman siya. Okay naman siguro sila kay nag-uban man to sila sa Chicago pag-concert nila didto. Nasuko gyud to sa una kay wa man gyud to nakabalo. Ako raman ang naingnan dayon ni Van. Magpabilin ming supportive niya,” nagkanayon ang papa ni Van sa Banat Hugyaw.
Ug tungod kay karong adlawa man ang audition sa Pinoy Dream Academy Season III mipasupot og mensahe si Van alang niadtong nangandoy nga mahisama niya:: “Linya lang bisan init. Kahibalo kong init gyud. Kung kabalo mo nga naa mo’y potential, sige padayon. Paningkamuti nalang gyud kay tuloy-tuloy na gyud na.”