Matud pa sa beteranang kolumnista sa Pangmasa nga si manay Lolit Solis lahi ang iyang pamati kung moduaw siya sa balay nila ni Lorna Tolentino ug sa namatay’ng bana niini nga si Rudy Fernandez. Manlimbawot ang iyang balhibo ug murag bugnaw ang hangin nga moduot sa iyang panit. Niya pa naa gihapon sa balay ang ispiritu ni Daboy ug wala pa biyae ang pamilya. Usa sa kamatuoran ang mao lang gihapon nga posisyon sa iro nga kanunay magbantay sa pultahan sa den sa panahon nga buhi pa si Daboy.
Dugang pa ni Manay Lolit nga wala gihapon maka-recover si LT sa pagpanaw sa iyang bana sanglit dili pa kini andam nga motrabaho og balik.
“At lahat ng natatanggap niyang bulaklak, dinadala niya sa Heritage (puntod ni Daboy). Doon niya agad dinederetso,” butyag pa ni Manay Lolit.
Walay hunong ang pagduaw ni LT sa lubong ni Daboy ug desidido kini nga pabuhatan og mausoleo sa kantidad nga 7M. Nabalita pod nga may plano kining adto mopuyo inig kahuman ug giangkon ni Manay Lolit nga wala siya’y katungod nga pugngan ang iyang alaga kung mao man ang gusto niini.
Sa March 3 na ang birthday ni Daboy ug ni Manay Lolit pa, maguol na pod ang biyuda ni Daboy. - Erveliza B. Colipapa