Gitunol ni KC Concepcion ang iyang pasalamat sa inahan ni Richard Gutierrez nga si Anabelle Rama atol sa gipahigayon nga presscon sa duruha dinhi sa Sugbo kagahapon alang sa ilang Valentine movie presentation nga gipanguluhang “When I met you”. Mahinumduman nga vocal kaayo nga gisugilon ni Anabelle ang iyang dakong gusto kang KC nga mamahimong uyab sa anak niini. Matud pa ni KC nga mapasalamaton ug “flattered” kaayo siya sa giingon ni Anabelle. Apan iyang gibutyag nga wala pa sa ilahang plano ang pagbutang og laing kahulugan sa ilang working ug traveling relationship ni Richard. Samtang malipayon si KC sanglit mao man kini ang iyang first time sa pag-apil sa mabulokon ug masadya nga Sinulog festival. Adunay kaugalingo’ng float nga giparada niadtong Domingo ang When I Met You nga gisakyan sa mga bituon niini atol sa parada. Ang maong pelikula mupakita sa pagtubo sa usa ka gugma tali sa duha ka managlahing tawo nga dili unta angay mahigugma sa panahon ug sa sitwasyon nga ilang nahimutangan.
Sa umaabot nga Pebrero 11 na buksan ang maong pelikula ubos sa Regal Entertainment ug GMA Films uban sila si Alfred Vargas, Iya Villania, Cherry Pie Picache, Tirso Cruz III, Eula Valdez, Tonton Gutierrez, JC Tiuseco, Freddie Webb, Paolo ug Bubbles Paraiso sa direksyon ni Joel Lamangan.