“Ang kapistahan sa Sto. Niño maoy labing importante nga okasyon, ang uban kay dayan-dayan lang na,” mao kini ang padayag sa kongresista sa unang distrito sa Sugbu nga si Rep. Eduardo Gullas atol sa 29th Cebu Popular Music Festival niadtong Biyernes sa gabii diha sa New Cebu Coliseum. Si Gullas maoy amahan sa tinuig nga kalihukan nga gitumong sa pagtamod sa Sugbuanong Musika.
Mabulokon ang maong gabii sanglit puros man makapatandog ngadto sa mga tawo ang 12 ka mga komposisyon nga giawit sa nagkadaiyang mga interpreter.
Ang komposisyon ni Jun Aliño Cabillar nga nag-ulohan og “Tim-os Kong Gugma” maoy nahimong grand prize winner diin ang interpreter niini nga si Gerlie-Lapinid –Laspiñas mao usab ang nahimong Best Interpreter.
“ Malipayon gyud ko kay wala gyud ko nag-expect kay puros man nindot ang tanang entries, nagtuo gyud ko nga ma-third lang ko. Inspirasyon gyud nako ang akong pamilya ilabi na sa akong mom, she’s a martyr mom, she keeps our family intact despite hardships in life, ingon man ang akong mga friends ug labaw sa tanan sa Kahitas-an,” butyag pa ni Jun kinsa nakakuha usab og ikatulong puwesto sa miaging tuig sa iyang kanta nga “Karon.
Ang nahisgutang awit nagbugtaw kalabot sa usa ka asawa nga gihimo ang tanan aron masalbar ang ilang kaminyuon, apan wala siya maglampuson.
Dako ang pasalamat ni Jun ngadto kang Girlie gumikan kay mihatag gayud kini og dakong kinabuhi sa gikanta niini atol sa contest nga miangkon gayud og makabungog nga pakpak gikan sa audience. Dugang pa niya nga partikular siya pagpili og interpreter, ug si Girlie ang iyang nalantawan nga mobagay sa pag-awit sa iyang komposisyon.
Walay kabutangan sa kalipay si Jun sanglit sa lima ka higayon na niyang salmot sa Cebu Pop, kanunay lang siya nga runner-up ug special awardee—karon lang siya nakalangkat sa grand prize.
“Longtime Dream”
Sa laing bahin, giangkon sa Best Interpreter nga si Gerlie nga sa dihang gitanyagan siya ni Jun nga mokanta sa komposisyon niini wala gayud siya magduha-duha sa pagsanong gumikan kay nakauyon siya pag-ayo sa kahulogan sa maong komposisyon ni Jun.
“Salamat kaayo sa akong pamilya ug sa akong mga higala nga ming-suport nako, ilabi na kang Jun Cabillar nga ako ang gipili niya nga mo-interpret sa iyang komposisyon. Salamat usab sa akong mga arranger nga sila si Nendel Endrina ug Joey Cabusas,” nagkanayon si Gerlie.
Sama ni Jun, kadaghan na misalmot si Gerlie sa Cebu Pop, gani kaduha na ka higayon nga nahimong grand prize winner ang iyang gi-interpret nga mga kanta.
“Sus longtime dream gyud ni nako nga ma-best interpreter. This is the first time,” angkon ni Girlie.
Samtang nakakuha sa ikaduhang puwesto ang awit nga “Pungko-pungko ”, nga hinimo ni Roy Tabasa ug sa susamang higayon mi-interpret usab uban nila ni Riel ug Rico Tabasa.
Ang awit nga “Sa Ngalan Sa Nasud “ nga tinagik ni Dennis Martin maoy nakakuha sa ikatulong puwesto diin ang interpreter niini mao si Maricel Suaring.
Mipuno usab sa kahugyaw niadtong gabhiona ang mga guest performers nga gilangkuban sa University of the Visayas (UV) Chorale ug UV Dance Troupe. Lakip pod nga mipakita sa ilang kahanas sa pag-awit sila si Kristel Daene Clores nga 2nd Children’s Pop Grand Champion ug ang Sugbuanon nga si Van Roxas.
Mipasiaw usab niadtong higayona ang mga hosts nga sila si Sam Costanilla ug ang kanhi scholar sa Pinoy Dream Academy nga si Apple Abarquez.
Gawas niini mipaambit pod sa iyang mananoy nga tingog ang Sugbuanon ug mapasigarbuhon sa Cebu Pop nga si Raki Vega, kinsa usa sa naglangkob sa panel of judges nga gipangulohon pod ni Secretary Cerge Remonde.
Crush ni Echo nagsugod sa letter K
Miangkon na diay si Jericho Rosales ngadto sa usa ka glossy magazine interview nga dunay siya’y crush nga artista diin ang pangalan niini nag-una sa letter K.
Busa nasulod dayon sa huna-huna sa mga tawo nga si Karylle ang gipasabot ni Echo..
“Secret na lang muna ‘yun. Kami kasi nina Tita Angeli (Pangilinan) we make a joke na, ‘K…K…K…K!’ because lahat na lang ng nali-link sa akin may K sound sa pangalan. Kristine (Hermosa), Carmen (Soo), KC ( Concepcion ), Karylle. Basta secret na lang muna,” matud pa sa aktor .
Pacquiao pang-hollywood na!
Tsika pa sa beteranang kolumnista nga si Manay Lolit Solis nga ang litrato nila ni Manny Pacquiao ug Sylvester Stallone nga nagtupad kay ebidensya nga nag-meeting na sila sa Amerika niadtong January 6 para sa usa ka pelikula nga ilang ubanan.
Matud pa nga si Stallone mismo ang mitanyag kang Manny nga mohimo sila og pelikula.
Playboy cover girl kever ang showbiz sa Pinas
Naa karon sa nasud ang 23 anyos nga Fil-Latina model nga si Saffi Karina. Ang dalaga maoy latest cover girl sa January issue sa Playboy Magazine.
Usa ka pinay ang inahan ni Saffi ug nagdako siya sa Dumaguete. Mitekang siya sa London para humanon ang iyang pagtungha.
Dunay nadawat nga mga offer si Saffi sa showbiz dinhi sa nasud pero dili pa kini mahitabo sa pagka-karon gumikan kay kinahanglan niya nga mobalik sa UK diin nagpaabot ang daghan niya nga mga commitments.