Van, Apple, UV Chorale lugwa sa Cebu Pop

Andam na ang tanan para sa 29th Cebu Pop Music Festival “Halad sa Señor Sto. Niño” karong alas 8:00 sa gabii diha sa New Cebu Coliseum. Sama sa naandan 12 ka mga entries ang magtigi karong tuiga, diin tulo niini ang mga bag-ong salga o una pa lang salmot sa composer.

Kini mao ang “Tsambang Musikero” ni Abner Lagdameo, “Asa Paingon” ni Manolito Languido ug “Kami ang Kabataan” ni Juve Villar. Samtang mao usab kini ang pagbalik ni Danilo Abapo sa iyang “Bulawanong Tambag.

Ang mokumpleto sa 12 ka entries mao ang “K.K.K. (Kabataan… kagahapon ug karun)” ni Jun Aliño Cabillar, “Sa Ngalan Sa Nasud” ni Dennis Martin, “Tinuohang Buktot” ni Jay-arr Librando, “Pungko-pungko” ni Roy Tabasa, “Sulti Pa Ka” ni Jay-arr Librando, “Bugtawon ang Kagahapon” ni Fr. Ponce Jed Bellones, “Tim-os Kong Gugma” ni Jun Aliño Cabillar ug “Ang Tambag ni Nanay” ni Engr. Bernard Gocela.

“We don’t have live band accompaniment this year and the participants will use the minus one. This is not the first time that we did this, we have one during the 9th Cebu Pop in 1989,” butyag ni Philogene Florita, ang project director sa Cebu Pop.

“Mas nindot ang CD accompaniment kay mas balance gyud ang sounds, i-compare nimo sa live band nga kong bungol ang drums, mabungol gyud and it would affect the performance itself. We are augmenting the production of each songs” dugang pa ni Phil.

Samtang niadtong Miyerkules pa lang, sold out na ang tag-P300 nga ticket. Hinuon duna gihapoy mapalit nga tag- P200, P100 ug P50 nga tickets.

Ang premyo sa grand champion mokabat P150, 000 samtang ang 2nd placer makadawat og P100, 000, ang 3rd placer P50, 000 ug ang tanang entries adunay tag P15, 000.

“Expect the best in the industry and veteran performers. Sec. Cerge Remonde will be the Chairman of the Board of Judges”, matud pa ni Florita 

Si Sam Costanilla maoy host sa maong indigay kauban ang guest co-host nga si Apple Abarquez, ug molugwa usab ang Pinoy Dream Academy Season 2 fifth placer nga si Van Roxas.

Mo-perform usab ang sikat kaayo nga University of the Visayas (UV) Chorale ug UV Dance Troupe. Lakip pod sa mga performers mao sila si Kristel Daene Clores nga 2nd Children’s Pop Grand Champion ug si Wilson Mendez ang Grand Prize winner sa 2nd Huniño.

Mapasalamaton ang mga organizers nilang Engr. Junjet Premor, Jay Unchuan ug sa Center for Pop Music Philippines sa ilang suporta.

Samtang gipahimug-atan ni Florita nga dili molungtad og ingun niini kadugay ang Cebu Pop Music Festival kung wala ang chairman ug amahan sa Cebu Pop nga si Congressman Eduardo Gullas. Si Congressman Gullas inubanan sa Cebu Arts Foundation Inc. (CAFI) ang nag-produce sa 29th Cebu Pop CD album nga giapod-apod sa Able Music Corporation.

Para sa mga tickets, mamahimong motawag sa UV High School Department sa telepono 416-7990 ug 255-2561.