Makalilisang nga pag-antos ang mahi-aguman ni Kim Chiu sa iyang bag-ong serye nga gipanguluhang “Tayong Dalawa”, diin daug-daugon siya sa beteranang aktres nga si Anita Linda isip iyang apuhan.
Kulbahinam kaayo ang role ni Kim sanglit matod pa sa young actress nga kanunay siyang lamparuhon sa iyang apuhan (Anita Linda) ug gani, maka-tulo siya nag-ilis og cell phone sa dihang bunalan siya sa sungkod niini sa maong serye.
Sa laing bahin, giklaro ni Kim nga wala niya hatagi og malisya ang kissing scene nila ni Jake Cuenca sa maong serye sanglit smack raman kini ug walay nahimong problema. Paambit niya nga layo ra kaayo kini sa iyang mga nangaging role tungod kay napuno man kini sa drama ug mga gikahinamang mga eksena.
Jericho ug KC alang sa usa ka Musical Concert
Parehong kapamilya sila si Jericho Rosales ug KC Concepcion apan kini pa lang ang unang higayon nga magkauban ang duruha sa usa ka proyekto, ug kini mao ang musical play nga “Katy”: The Musical Concert. Matod pa sa actor nga maayo ang nahimong working relationship nila sa anak sa Megastar.
Samtang excited usab kaayo si KC sa iyang barugan nga papel isip Katy Dela Cruz. Ang Katy The Musical ang highlight sa 34th Metro Manila Film Festival Philippines nga pagahimuon karong December 27 sa Harbor Garden Tent sa Sofitel, Philippine Plaza Manila human ang “Gabi ng Parangal”.
Ang Tanging Ina, makalingaw ug matulun-anon
Suma pa sa gipanaad nila ni Wenn Deramas ug Aiai de las Alas, ang ilang MMFF entry nga Ang Tanging Ina N’yong Lahat usa ka mabulokon ug makalingaw kaayo nga pelikula sanglit ang mga mananan-aw wala gyud gibati og kalaay sa pagsugod hangtod sa paghuman niini. Syempre, adunay mga nasal-ot nga drama sa maong pelikula nga gikinahanglan usab aron mapakita ang storya sa gahum ug kalampusan sa usa ka babaye bisan pa sa daghan niining responsibilidad isip usa ka inahan.
Matod pa nila ni Aiai ug Eugene Domingo nga kun silang na gani mag-uban kay seguradong mag-hudyaka ang mga manan-away.