Aninaw sa Metro Manila Film Festival 2008

Ang Dayo usa ka mainit nga estorya sa pag-atubang sa tagsa-tagsang gikahadlokan ug sa pagkamalampuson taliwala sa mga babag sa kinabuhi. Ang estorya nagtuyok sa usa ka 11 anyos nga bata nga si Buboy (Nash Aguas ang nagdala sa tingog), kinsa gustong moluwas sa pinalangga niyang mga apohan nga tua sa Elementalia, usa ka “magical ug mystical” nga kalibotan diin kadaghanan sa mga nilalang didto nagpuyo ug ang uban pang mga katingalahang elemento.

Sa iyang dalan padung sa Elementalia, makasugat ni Buboy si Anna Manananggirl (Katrina “Hopia” Legaspi), nga usa ka batan-ong anananggal kinsa nahimo niyang higala sa pakigkombate sa pagluwas sa iyang mga apohan.

Si Johnny Delgado ang nagdala isip amahan ni Anna Manananggirl samtang ang iyang asawa nga si Laurice Guillen ang nagdala sa tingog sa mga minor characters sama sa diwata, Director Peque Gallaga ang luyo sa tingog sa nuno sa punso, ug si Michael V ang nagdala sa narcissistic tikbalang nga ginganlan og Narsi. Ang batan-ong anananggal adunay yaya nga gi-dub ni Pokwang.

Magkaibigan

Usa kini ka estorya sa duha ka managhigala, kinsa ang usa nataptan sa sakit nga cancer. Suod nga managhigala sila si Atoy (Christopher de Leon) ug Ruben (Sen. Jinggoy Estrada) sukad pa sa pagkabata. Dili sorpresa kung hangtod pila na ka dekada ang nanlabay padayon gihapon ang ilang panaghigalaay ug bisan pa og aduna na sila’y tagsa-tagsa ka mga pamilya. Nahimong malampusong negosyante si Atoy nga naminyo sa usa ka gwapang babaye nga si Tere (Dawn Zulueta), aduna sila’y duha ka anak nga sila si Jonie (AJ Perez) ug Katrina (Empress Schuck). Si Ruben nga mas hambog ug gahi og ulo, naminyo kang Eden (Maricel Laxa) diin nagkaanak sila og duha ka lalake nga sila si Benjie (Ryan Julio) ug Dodie (Justine Plummer).

Apan nasukod ang tinuoray nga panaghigala sa panahon diin kalit nga gi-diagnosed nga dunay pancreatic cancer si Atoy. Gisugo ni Ruben ang tanan nilang higala (Tirso Cruz ug Bobby Andrews) sa pagsuporta kang Atoy nga hatagan siya og kusog sa pakigkombate sa makamatay nga sakit. Nakita ni Benjie ang iyang amahan nga padayong nakigbisog para sa iyang suod nga higala ug gisiguro niya nga anaa siya kanunay alang sa pamilya ni Atoy.

Iskul Bukol

Ang estorya nagtuyok sa kinabuhing kolehiyo, sa Wanbol University. Ang mga karakter mao sila si Victor Ungasis- good-looking, matinabangon ug utokan nga pet sa mga magtutudlo, sila si Tito ug Joey Escalera nga mga badlungon sa klase kinsa kanunay moalalay ni Vic, Miss Tapia nga usa ka university resident professor nga naibog kang Joey, Bibeth nga opinionated friend ni Vic, Mang Temi nga operator sa school cafeteria, Tonette Macho nga estudyanteng bayot nga mahimong higala sa labing maanyag nga babaye sa klase nga si Joey Anson, ang campus darling nga apple of Vic’s eye. Human sa 20 ka tuig, si Vic Ungasis usa na ka maayong history professor sa Wanbol University ug malampuson na usab sa natad sa arkeyolohiya. Ang recent recovery niya sa Kali of Humabon miabli sa pultahan sa usa ka misteryo. Nanghinaot siya nga sunod niyang makit-an ang Kampilan of Lapu-Lapu ug mapakita ang twin war relics, side by side. Ang Kampilan naa sa mga kamot ni Shimata, usa ka adunahang Hapon ug ang gihatagan og dakong interes mao ang Peseta, nga makit-an sa bracket sa Kampilan. Ang Peseta usa sa mga 30 kabuok nga nabiling Juda’s silver nga maghatag og walay kataposang kinabuhi sa kinsa mang maghupot niini.

Sa maong istorya motuyok ang pagpanimpad nila ni Tito, Vic and Joey.