Mga bading selos na selos sa dyowa ni JC

Marami sa mga kaibigan kong bading ang halos mamatay sa selos sa presen­ce ng girlfriend ni JC Tiuseco nung gabing iproklama ito bilang Pinoy Sole Survivor na ginanap sa isa sa mga istudyo ng bagong tayong GMA Network Center.

Nauna nang nagselos ang mga bading nang imbitahan ang kanyang nobya ng GMA 7 para tulungan si JC sa isa sa mga challenges niya sa Survivor Philippines. Habang ang mga kalaban niya ay tinulungan ng isang miyembro ng pamilya nila, tanging si JC ang may nakasamang magiging miyembro pa lamang ng pamilya niya. Lalo silang nagselos nang muling magpakita ito sa Survivor the Finale.

Hindi naman nakapagtataka kung magkaroon ng pagtatangi hindi lamang ang maraming bumoto kay JC para manalo kundi maging ang mga bading dahil pinaka-guwapong nakasali sa Survivor Philippines ang basketbolistang taga-San Sebastian College. Idagdag mo pa ang pangyayaring matangkad ito at batang-bata pa. Hindi kataka-taka kung madalas ay umasa ito sa desisyon ng ibang nakatatanda sa kanya sa reality search program, lalo na sa itinuring niyang Kuya Kiko. Maraming ulit, halos mag-quit na siya sa programa dahil sa sobrang hirap, pagod at kawalan ng maayos na matutuluyan at pagkain, pero maraming ulit din niyang napigilan ang sarili. Sa nasabi ring programa nag-mature siya na naging dahilan para tuluyan niyang makuha ang titulo. Bilang premyo sa dinanas niyang hirap, tatlong milyong piso ang iuuwi niya at isang brand new car na premyo niya sa isang challenge na napanalunan niya. Sinabi niyang ang P3M ay ibibigay niya ng buo sa kanyang mga magulang parang tulong sa kanilang negosyo.

Hindi na ipinagpatuloy ng host na si Paolo Bediones ang pagbilang sa boto ng jury na binubuo ng walong pinaka-huling castaway –Chris, Nanay Zita, Kiko, Veronica, Marlon, Kaye, Charisse at Jace - dahil unang nakakuha ng limang boto si JC kontra sa dalawang boto ni Rob na kitang-kita ng marami na nanonood sa istudyo na mas tensyonado kesa kay JC. Si JC din ang nakakuha ng boto ng bayan, 97% kontra sa 7% boto na nakuha ni Rob.

Wala nang mas hihigit pa sa pangyayaring nakakita siya ng pag-ibig sa show in the person of Veronica. Balitang naipakilala na nilang pareho ang isa’t isa sa kani-kanilang mga magulang.

Hindi mahihirapan ang GMA 7 na gawing artista si JC. Bukod sa matangkad ito at guwapo, marami na itong nakuhang mga fans habang ginaganap ang Survivor Philippines.

***

Hindi akalain ng grupong Babae na binubuo ng mga magkakaibigang Lovely Rivero, Glenda Garcia, Shyr Valdez at Jenn Umali na papatok ang kanilang Babae Concert sa Teatrino Greenhills. Nagulat pa sila nang dadalawang linggo pa lamang ang nakararaan ay nagkaroon na ito Babae the Repeat sa Captain’s Bar ng Mandarin Hotel. Makaraan ang apat na buwan, idaraos ng kanilang grupo ang ikatlo at pinaka-malaking konsyerto nila, ang Babae…Stronger sa Disyembre 18, 9:00 N.G sa Music Museum. Muli, ipo-prodyus ito ng kaibigan nilang si Emeellee Mercado Coronel at ni Gov. Jade Ecleo ng Dinagat Islands bilang co-producer.

Napahinuhod din ng Babae ang mabait na gobernadora na mag-perform sa concert. Kakanta ito’t sasayaw kasama ang Babae. Sa mga hindi nakakabatid, isang accomplished dancer and singer ang gobernadora.

Ang apat na miyembro ng Babae ay pawang mga showbiz personalities and accomplished in their own right. Si Jenn Umali ay isang events host, model, nanalong Miss Bautiful Girl sa Eat Bulaga at napanood sa Daisy Siete at sa indie film na Hilot.

Si Shyr Valdez ay isang professional singer na huling napanood sa Asero at gumanap na Gracia Burnham sa isang docu tungkol sa Dos Palmas, Palawan abduction.

Si Glenda Garcia ay artista sa pelikula at TV. Napanood siya sa Book 1 & 2 ng Maging Sino Ka Man at mayroon pang gagawng bagong serye sa ABS CBN.

Beteranang artista na rin si Lovely Rivero, namumuno ng Fabuloso Events and Entertainment company. Napapanood siya sa kasalukuyan sa Luna Mystika ng GMA, ang talk show ng NBN4 na She-Ka, Komiks Presents Dragonna ng ABSCBN.

Makakasama rin sa Babae…Stronger ang matagal nang nami-miss na si Rachel Lobangco na ipamamalas ang kanyang husay sa fire dance.

***

Mga kaganapan sa huling gabi ng burol ni Marky Cielo ang ihahatid ngayong hapon ng Showbiz Central, mula mismo sa Mountain Province.

Sana umabot sa show ang findings sa naging dahilan ng pagpanaw ng aktor para mabura na yung mga naglalabasang mga haka-haka na baka naman lihis sa katotohanan, para sa ikatatahimik ng kanyang mga mahal sa buhay at maraming tagahanga.

 Ilalahad din sa SC ang buhay ng mag-asawang Jessica Rodriguez at David Buenavacz straight from the US at exclusive sa pang-hapong palabas na ito ng GMA 7.