Tumang ka-hugyaw ang gidalit nila ni Ai-Ai Delas Alas ug Eugene Dominggo sa mga sakop sa local entertainment press kagahapon sa Parklane Hotel atol sa ilang press conference alang sa ilang bag-o nga pelikula nga “Ang Tanging Ina Ninyong Lahat” diin entry kini sa Metro Manila Film Festival .
Gibutyag ni Ai-Ai nga gusto na niyang magminyo si Eugene kinsa nagpangidaron na karon og 37-anyos dihang gipangutana kini sa usa sa mga miyembro sa media kung unsa ang iyang wish sa suod nga higala karong umaabot nga Pasko.
Pasi-aw usab ni Eugene nga labing nagkinahanglan si Ai-ai og kapikas sa kinabuhi ilabi na karon nga dagko na ang mga anak sa sikat nga aktres-comedienne.
Ang duruha mag-uban na usab sa laing makalingaw nga pelikula, diin si Ai-ai modala sa papel nga inahan sa nasud . Nangita siya og paagi aron nga magmapasigarbuhon ang iyang mga anak kaniya uban ang iyang suod nga higala nga bituonan ni Eugene isip Rowena nga sa madugay iyang mahimong spokesperson.
Ang laing mga bituon nga maglangkub sa maong pelikula mao sila si Carlo Aquino, Shaina Magdayao, Alwyn Uytinco, Serena Dalrymple, Yuuki Kadooka, John Prats, DJ Durano ug Gloria Diaz. Erveliza Colipapa
Angel Locsin ug Piolo nagdungan og larga
Nagdungan og larga ang duha sa labing sikat nga bituon sa Pilipinas nga sila si Angel Locsin ug Piolo Pascal alang sa premiere night sa ilang bag-ong pelikula nga Love Me Again sa Estados Unidos nga pagahimuon sa Los Angeles ug San Francisco karong Disyembre 6 ngadto sa 7.
Malipayong milarga ang duha tungod kay pareho man kini nga nakadawat og award sa Star Awards for TV diin ilang nadawat ang labing gikahinaman nga Best Actor ug Best Actress awards isip pahalipay sa pagka-maayo nga aktor ug aktres sa duruha sa natad sa telebisyon.
Sa laing bahin, gitakda usab nga magkita si Angel ug ang manager niini nga si Becky Aguila sa Estado Unidos ug gidahom nga mag-uban usab pag-uli nganhi sa nasud human sa maong premiere night.