Marian gibuking ni Ruffa

Gibuking ni Ruffa Gutierrez si Marian Rivera sa sadya kaayo nga presscon sa Desperadas 2 niadtong Lunes sa gabii mahitungod nga maka-duha gayud siya gigakos sa aktres. Matod pa sa sosyalerang aktres, gawas pa sa bongga ang mga sinena ug mga gamit sa dalagang aktres, aduna pa gyud kini kaugalingon nga stylist.

Susama ang obserbasyon sa co-stars sa dalagang aktres nga sila si Rufa Mae Quinto, Iza Calzado ug Ogie Alcasid nga matud pa kong walay take ang dalaga, anaa ra gyud kini sa suok ug mag-sige og text, ug human og text aduna na pod kini ka-istorya sa cellphone ug lahi ang sidlak sa mga mata niini.

Batbat usab ni Marian nga lahi ang iyang karakter sa maong pelikula sanglit gihimo siya niini nga “girl” ni direk Joel Lamangan, ug gikinahanglan sa production nga bongga ang iyang wardrobe.

Sa laing bahin, pwerteng himuota sa miyembro sa press dihang gi-angkon ni Ruffa Gutierez sa The Buzz nga nakarma kini sa iyang pagtubag-tubag sa iyang inahan kaniadto. Mao nga karon, matud niya dili na gyud siya motubag sa iyang inahan.

Ogie gibati og kamingaw sa mga anak

Mao pa lang ang pag-abot ni Ogie Alcasid gikan sa Australia niadtong Sabado sa gabii. Matud sa actor nga gibati siya og tumang kamingaw sa iyang duha ka mga anak nga sila si Leila ug Sarah mao nga pagkahuman sa iyang shooting sa Desperada milupad dayon kini paingon sa maong nasud.

Dungag niya nga nalingaw siya sa komentaryo sa iyang mga anak dihang nakakita kini sa pictures niya sa iyang role sa Desperada ug miingon kini nga, “Dad, is that really you?” ug nagkinataw-anay ang duha.

Iya usab nga gipadala kang Regine ang maong mga pictures ug pwerte usab niining agik-ik og katawa sa Songbird.

Matud pa sa singer-songwriter nga tribute na kini niya kang Joel Lamangan ug sa mga dark woman of the world sa iyang pagdawat sa tanyag ni Mother Lily nga mao ang himuong prinsesa sa Kehwali, South Africa.

Ug tungod kay pang-babaye ang iyang role, gikinahanglan usab nga mogamit siya og bra mopilit sa panit aron dili kini mahulog.

Ai-ai gisakitan ug mihilak

Klaro ug tataw kaayo ang kasakit nga gibati ni Ai-ai delas Alas sa ilang dili pagka-ayo og buot ni Kris Aquino sanglit nakahilak kini niadtong Domingo sa pangutana ni Boy Abunda atol sa Tough Ten Segment sa The Buzz.

“Siguro ‘yung mga nangyari, nangyari ‘yon kasi kinampihan ko siya (Kris) kasi kaibigan ko siya. And kahit anong mangyari kaibigan ko siya. Naninindigan ako na kaya ko nasabi ‘yon kasi sa pagmamahal ko sa kanya,” batbat niya nga nag-luha luha ang mga mata.

Samtang nag-hilak ang actress-comedianne, gihanduraw sa staff sa maong show si Kris sa rason nga i-uli ang duruha sa maayo niining kabubut-on apan no where to find ang sikat nga actress-host.