Ang pagbi-breastfeeding kay baby AJ o Alex Jazz at diet ang sinabing rason ni Jennylyn Mercado sa mabilis niyang pagpayat. Six times a day siya nagbi-breastfeed and one big meal a day lang siya kaya, she’s back to her normal weight na 108 lbs.
Kaya mabilis nakabalik sa trabaho si Jennylyn dahil payat na at kailangan na rin niyang magtrabaho para sa pangangailangan ni baby Jazz at para mapalitan ang less P500,000 na ninakaw diumano sa kanya. Ayaw nang magsalita ni Jenny tungkol dito’t nasa korte na ang kaso’t nag-file na siya ng 19 counts ng theft laban sa dati niyang handler.
Hindi natigatig si Jennylyn sa nalamang idedemanda rin siya ng dating handler at matapang na “go ahead” ang sagot at mabuti raw iyon para malaman kung sino sa kanila ang nagsasabi ng totoo. Pinagsisisihan nito nang sobra siyang nagtiwala at ipinagkatiwala ang kanyang pera at dahil nasaid, kailangan niyang muling magsipag.
Pasalamat si Jennylyn na binibigyan uli siya ng projects ng GMA 7 gaya ng two-part episode ng Dear Friend na magsisimula sa Sunday, November 2 at magtatapos sa November 9. Balik-tambalan din nila ni Mark Herras ang Alex and Toni episode sa direksyon ni Jun Lana.
Nanibago ng konti si Jennylyn working with Mark again, pero dahil friends sila at magiging magkumpare, plus inaalalayan siya nito, madali siyang nakapag-adjust. Payag ba siyang makatrabaho sina Mark at Patrick Garcia sa isang project?
“Tatanggapin ko, puwede at gusto ko, pero gusto ko kay Mark ako babagsak at hindi kay Patrick,” sagot ni Jennylyn.
Wala pa ring balak ipakita ni Jennylyn kay Patrick si baby Jazz. Hindi rin ito puwedeng maghabol dahil apelyido niya ang gamit ng bata at NA o Not Applicable ang nakalagay kung sino ang ama ng bata.
* * *
Nagpa-hair extension si Isabel Oli para sa role niya sa Gagambino na ang kanyang powers ay nanggagaling sa kanyang nakatirintas na buhok. Nag-aral din siya ng hand combat at nag-workshop on animal movements para mas pulido ang kilos niya ’pag gumagawa ng stunt.
Gaya sa ibang cast members, tuwang-tuwa si Isabel sa mataas na ratings ng fantasy-action series at wish nilang lahat na ma-maintain o mas tumaas pa ang ratings ng show. Sa writers, buong staff, direk Topel Lee at GMA 7 sila nagpapasalamat.
Tsinika pala ni Isabel na ang bonding nila nina Glaiza de Castro at Nadine Samonte, mga kasama niya sa Gagambino ay ang malapit nang ipalabas na pelikulang Twilight na adapted sa libro ni Stephenie Meyer and consider the “in” book ngayon sa rami nang nagbabasa.
Hindi pa nababasa ni Isabel ang four books ni Meyer and after the movie na niya ito babasahin. Sina Nadine at Glaiza ang nagbabalita kung may labas na bagong trailer sa YouTube at tagabili ng Twilight merchandise, gaya ng T-shirt.
Nagpahingi rin sila ng tiket kay Rufa Mae Quinto sa Viva Entertainment para sa celebrity premiere ng movie sa November 25, at sabay-sabay silang manonood. Ang feeling daw nila, sila si Bella Swan, ang character ni Kristen Stewart sa movie.
* * *
Aalamin sa Friday episode ng Moms na The End Na Ba Kapag The End Na? kung saan pumupunta ang kaluluwa ng taong namatay. Ang spirit questors na sina Chiqui Martinez, Ian Opeña at Roy Alvarez ang sasagot nito.
Monday to Friday, 5 p.m., sa Q-11 napapanood ang Moms at hosts sina Lani Mercado, Sherilyn Reyes at Manilyn Reynes.