First timer ang first Mr. Cebu

Mabulokon ug malampuson ang gipahigayon nga labing unang Mr. Cebu 2008 niadtong Biyernes sa gabii sa Waterfront Hotel and Casino Lahug. Sa samang higayon duna poy mga nakugang human wala masulod ang duha ka mga crowd favorites sa Top 10.

Dise-sais ka mga ambongang lalake ang nag-tigi niadtong higayona diin mipasigarbo sa ilang tagsa-tagsa nga beach wear  nga inubanan sa ilang hugyaw nga production number  ug formal attire nga mugna sa nagkadaiyang designer sa Sugbu.

Ang nakakuha sa titulong Mr. Cebu 2008 mao ang 20 anyos nga si David Chai Tingalin nga mihulagway  sa Cebu  nga nindot nga lugar. Matud pa niya nga wala siya nagdahom nga siya maoy makalangkat sa titulo, ilabi na nga labing una pa lang niya nga inidgay sa kaambong ang Mr. Cebu. Pure Filipino si Tingalin, apan sa Thailand siya gihimugso.

“I’m still shock. This is the first time I join something like this and just to be part of it is so exciting,” butyag pa ni David ngadto sa Banat Hugyaw.

Ang tubag ni Tingalin sa final question nga angay dasigon ang mga kabatan-onan pagboluntaryo aron pagtabang sa mga uyamot nga mga bata pinaagi sa pagpahigayon og feeding program sa kabarangayan tataw nga maoy nakapadaog niya. Suma pa ni Tingalin nga angay nga gamiton niya ang iyang titulo aron makakita og sponsors alang sa feeding program. Ang final question mao kini: ‘As the first Mr. Cebu what one thing can you do to h av e an effect on Cebu City this year?

Ang usa sa mga crowd favorites nga si Hans Joakim Groggard maoy napili nga 1st runner-up. Si Groggard nga sakop sa A.D. Models sa designer nga si Dexter Alazas nagkanayon nga wala siya magdahom nga makaabot siya sa Top 5, sanglit buot man lang niya nga malingaw busa misalmot siya sa maong indigay, diin igo na kaayo niya nga nalakip siya sa Top 10.

Samtang ang usa sa mga aktibo sa  modeling world ug mahilig sa skateboarding nga si Kurt B. Agbay maoy napili nga 2nd runner-up kinsa miingon nga grabe gyud ang pressure sa pagsalmot niya sa Mr. Cebu ug mapasalamaton siya nga nasulod siya sa Top 5.

Ang 5’9” nga No. 1 SK councilor sa usa ka barangay sa Lapulapu City nga si Mariano Dandie C. Dimatiga maoy 3rd runner-up. Mapasalamaton si Dandie ngadto sa iyang mga higala , pamilya  ug sa Kahitas-an nga maoy iyang tinubdan sa suporta sa iyang pagsalmot sa Mr. Cebu.

Ang Optometry student sa Southwestern University nga si Marvin Campaner  ang napili nga 4th runner-up ug miangkon nga mga lig-on gyud ang iyang mga katigi sa maong pageant busa wala siya magdahom nga masulod siya sa Top 5.  

“I feel great, this is unexpected,” dalikyat pa ni Marvin ngadto sa Banat Hugyaw.

Gihulagway sa tag-iya sa BCB Productions nga si Bong C. Bantilan nga malampuson gyud ang una niyang pagpahigayon sa Mr. Cebu, diin niya pa haom ang tanan nga mga nagmadaugon.

Beneficiary sa nahisgutang pageant ang SOS Children’s Villages kinsa pipila sa ilang mga bata mihatag usab og makahugyaw  nga mga intermission number niadtong gabhiona, nga nakapahimangod sa tanang mitan-aw.

Midugang usab sa kahugyaw sa Mr. Cebu 2008 pageant night ang duha ka mga host  nga sila si Angel Aquino ug Ana Maris Igpit.