Karylle ug Dingdong buwag gyud?

Ang pagdumili ni Zsa Zsa Padilla pagluwat og pamahayag kalabot sa intriga nga buwag na sila si Karylle ug Dingdong Dantes, gitan-aw sa mga himantayon nga senyales nga tinuod ang nahisgutang taho. Si Zsa-Zsa nahinabi sa media niadtong milabay nga adlaw diin mirason kini nga angay nga sila si Karylle o Dingdong ang pangutan-on labot niini. Suma pa sa mga himantayon nga kahibulungan ang pagdumili ni Zsa Zsa tungod kay naandan man nga vocal kini pagtubag sa bisan unsang pangutana. Gibutyag hinuon ni Zsa Zsa nga nag-dinner sila ni Karylle niadtong Domingo ug wala makalugwa si Dingdong kay may taping kini para sa Dyesebel.

Patani sikat na gyud

Tungod sa pagkalagpot ni Patani sa Survivor Philippines niadtong Lunes sa gabii, nasuta nga daghan gyud diay ang ganahan sa nahisgutang castaway gikan sa San Francisco Camotes. Sa Philippine Entertainment Portal-Forum nagbaha ang panawagan nga hatagan og dugang “exposure” si Patani pinaagi sa pagbutang niya sa Eat Bulaga, Bubble Gang o Nuts Entertainment. Duna poy mga miingon nga dili na sila motan-aw og Survivor tungod kay wala na ang ilang kinaham nga si Jervy “Patani” Dano. Duna pa gani miingon nga angay nga ugmaron sa GMA-7 ang pagka natural joker ni Patani kay mahimo kining isakbang kang Pokwang.

Survivor Official Statement

Nagpadala og official statement ang GMA-7 Corporate Communication sa Banat Hugyaw aron pagtin-aw sa migawas nga balita nga ang hardcourt heartthrob nga si JC ang napili nga Sole Survivor sa nagpadayon karon nga reality show sa Kapuso network. Sama sa nabalita na sa Banat Hugyaw kagahapon hugtanon nga gihimakak sa GMA-7 ang maong balita kalabot sa kadaogan matod pa ni JC. “There is absolutely no truth to the irresponsible rumors being spread  on  the internet that the winner for Survivor Philippines has been determined. The final votes  have been sealed, hidden in a vault and have yet to be counted.  The tallying of the votes will only be done during the live telecast of the final episode in December.”